Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

05/10/2021

IX esixi una planificación de los eólicos énte'l 'boom' d'estes plantes de xeneración eléctrica

Ovidio Zapico denuncia proyectos en zones especialmente protexíes y reclama al Gobiernu que deniegue l'autorización

El diputáu y coordinador xeneral d’IX Asturies, Ovidio Zapico, esixó güei midíes pa torgar la crecedera desafranada de parques eólicos. El parllamentariu esixó al Gobiernu qu'esplique qué mecanismos de protección esisten pa evitar la proliferación incontrolada de parques eólicos na zona rural, bien especialmente naquellos llugares que cunten con dalguna figura de protección medioambiental, una presión que yá ta xenerando malestar na zona occidental d'Asturies.

Zapico aseguró que la posición d'IX nun supon un refugu a esti tipu d'enerxía sinón a la necesidá de compatibilizar desenvolvimientu y sostenibilidá. "Nun hai que llegar nin al estremu de negar una fuenta d'enerxía llimpia, que pueda contribuyir a amenorgar unes emisiones y averanos a esos oxetivos de descarbonización fitos nel alcuerdu pal añu 2050 del Cume de París, como tampoco compartimos lo que, ensin dulda, ye un boom que xeneró, como yá ta dicho munches vegaes, esmolición y alarma". Tal ye asina, añedió'l diputáu, qu'ayeri mesmu, na Comisión de Retu Demográficu'l señor Calvo (en referencia al Conseyeru de Mediu Rural) reconocía que xenerara esmolición en munchos territorios de les zones rurales. Negóse, per parte del Gobiernu, mientres enforma tiempu esa esmolición; reconozse güei y eso yo creo que ye bien bonu".

Al respective de los mecanismos de regulación, el coordinador xeneral d'IX pidió que s'ellabore una previsión que dexe una crecedera de les instalaciones eóliques dientro d'un permediu: "tenemos qu'empezar a dicir qué se va a poder faer; qué nun se va a poder faer. Qué se va a dexar, qué nun se va a dexar per parte del Gobiernu d'Asturies. Tien qu'haber una planificación".

Ovidio Zapico tamién esixó que s'empiece a aldericar les zones nes que van poder instalase los parques eólicos, la so estensión ya inclusive, añedió, "cuántu van midir d'altor les mesmes torres". A xuiciu del parllamentariu, ta perdiéndose un tiempu pervalible cuando lo que se debería de tar ufiertando ye "certidumbre".

Nestos momentos, sollertó'l diputáu d'IX, esisten dellos proyectos que se plantegen pa zones protexíes que'l Gobiernu tien d'esclariar si van salir alantre. "Hai que falar claramente a la xente: cuálos d'esos proyectos van ser refugaos pol so impactu o porque nun s'afaen a la normativa que tenemos a valir como, fai apenes diez díes, diósenos a conocer na Comisión, la selmana pasada, creo que foi'l miércoles, de Mediu Rural, de que nun autorizaría la macroplantación en Nueva de Llanes. Pos agora hai que dicir lo mesmo con dalgún parque eólicu".

Esisten, señaló Zapico, figures de protección, como la de Reserva de la Biosfera na zona d'Ozcos-Eo qu'el mesmu Ministeriu de Transición Ecolóxica nuna memoria de "zonificación ambiental" pa la implantación d'enerxíes anovables na que diz que les zones núcleu y de protección son zones de sostenibilidá ambiental máxima y que nun tendríen de construyir se eólicos. "Con éses, tenemos dellos proyectos que pasen per eses zones n'Asturies y que yo quiero escucha-yos a ustedes que nun se van a faer ende"

Volver

Compartir

2014 Izquierda Xunida d'Asturies - Política de privacidad - Política de cookies