Menu

La iniciativa encamienta al Gobiernu a ellaborar un Plan de Tresporte pa les nales d'Asturies, con soluciones específiques pa la población del Occidente y l'Oriente

La Xunta Xeneral del Principáu aprobó güei, por unanimidá, la proposición non de llei conxunta presentada por Izquierda Xunida y Podemos cola que pretende ponese solución a los problemes del tresporte escolar. La vocera d'IX, Ángela Vallina, recordó que fueron yá delles les iniciatives pa tratar de resolver un déficit qu'afecta, especialmente, a la población de les zones rurales y que forma parte, tamién, de les midíes que tienen de ponese en marcha pa superar el retu demográficu.

La PNL aprobada encamienta al Gobiernu d'Asturies a axuntase de forma inmediata coles persones afectaes pola falta de tresporte accesible nel Occidente d'Asturies y que, por tal motivu, nun pudieron empecipiar el cursu académicu. Amás, prúyese al executivu autónomu a poner a disposición d'estos alumnos alternatives de movilidá accesible y, pa evitar problemes n'años vinientes, a que ponga en marcha un Plan de Tresporte pal Oriente y Occidente d'Asturies que dexe dar respuesta, non solo a les etapes obligatories, sinón tamién pa los ciclos formativos superiores. L'oxetivu, según se recueye na proposición, ye "evitar la discriminación social y educativo que carez la mocedá del mundu rural".

Pa Vallina, ye imprescindible que los alumnos tengan los mesmos derechos con independencia d'onde vivan.