Menu

Ovidio Zapico asegura que l'oxetivu ye sumar a "aquellos que son distintos, pero que nun son distantes"

Izquierda Xunida d'Asturies empecipió esta mañana la so convención programática cola voluntá de "enanchar" el so espaciu políticu, pa redefinir la redolada más a la izquierda del Partíu socialista, al igual que ta asocediendo nel contestu nacional. El coordinador xeneral de la formación, Ovidio Zapico, esplicó que l'oxetivu ye sumar a "aquellos que son distintos, pero que nun son distantes, que tienen pensamientos y que tienen reflexones bien paecíes a les nueses". Esa determinación pa enanchar esplica, tamién, según el dirixente, la presencia ente los ponentes de "compañeros y compañeres que nun tán n'IX, pero que sí tán nesa redolada cultural, nesa redolada política".

Esta nueva etapa nun ye esclusiva d'Asturies y vien, igual qu'asocede a nivel nacional, aseveró Ovidio Zapico, en "momentos d'enanchar tamién esos horizontes, momentos d'enanchar eses plataformes". Y nesi marcu, l'oxetivu d'IX tien que ser, a xuiciu del so coordinador, "dir a esos espacios, en redol a proyectos que quieran tresformar la sociedá, que quieran ameyorar les vides y les condiciones de la clase trabayadora y que tenga un filo, el filo coloráu de la hestoria bien claro".

Zapico enfatizó qu'esti procesu escuerre reforzar la organización: "vamos salir d'equí más fuertes" y con un horizonte y redolada más ancha.

Ente los ponentes, persones nel so día venceyaes a IX, como Gaspar Llamazares, pero tamién del ámbitu asturianista, como Víctor Suárez ya Inaciu Galán, o del sindicalismu de clase representáu por Ursula Szalata. Precisamente, a entrugues de los medios, Zapico esplicó la presencia del ex diputáu de la formación dientro del espíritu constructivu de la convención. "Tenemos que ser conscientes de qu'Izquierda Xunida, como diz esti cartelu (n'alusión al lema de la xornada) vamos tar onde la xente quiera venos y que tenemos qu'ampliar, sumar a esti proyectu más xente que nun ta nél, pero que sí ta na so redolada y que tenemos que, poro, venir a momentos d'apertura, venir buscar espacios atentos d'alcuentru o de realcuentru, como pueda ser el casu, y, nesi sentíu, yo creo que, non solo, la presencia de Gaspar sinón de más compañeros y compañeres que tán nesi ámbitu qu'hai a la izquierda del PSOE pero que nun tán enmarcaos güei n'IX, nin tampoco en Podemos, tienen que tener equí'l so espaciu, redolada al alderique y la reflexón p'asina empezar a construyir con más fuerza".

La convención arrincó con un homenaxe a Horacio Fernández Inguanzo, a la que precedieron les intervenciones de Leticia Gil, secretaria de Programes, quien apostó por "sumar" p'avanzar, al igual que la secretaria d'Igualdá, Begoña Collada, pa quien ye indispensable ampliar la base política d'IX.

Pela so parte, la diputada y vocera parlamentaria, Ángela Vallina, aseguró que la convención "ye solo l'entamu y non el fin de nada. Tenemos hestoria, el nuesu pasáu, la nuesa mochila; y tamién presente, que se reflexa na nuesa presencia institucional, nel Parlamentu y nos conceyos, onde somos la segunda fuerza d'esta Comunidá, con alcaldeses y alcaldes que demuestren, acaldía, que ye posible otra forma de faer política".

Vallina llamó a recordar la trayectoria d'IX como pasu indispensable pa planiar el futuru: "Pa entender el presente, precisamos conocer el nuesu pasáu. Equí, nesta cenciella premisa, mora tamién la posibilidá de rescatar tolo bono, preveninos contra los erros y, sobremanera, proyectar el futuru. Esa ye la xera que güei empecipiamos nesta Convención, na que nun sobra naide que tenga por oxetivu siguir siendo una fuerza con capacidá de tresformamientu y de cambéu, en tolos ámbitos. Como diz el lema d'esta convención, güei empezamos el trayectu pa tar onde quies venos".