Menu

Izquierda Xunida va preguntar nel próximu Plenu sobro cómo encara'l Gobiernu d'Asturies pa falar de la xestión de la pandemia de COVID, tres la relaxación de les midíes pa prevenir la enfermedá.

La vocera de la formación, Ángela Vallina, xustificó la iniciativa na supresión de les cuarentenes en casos leves o asintomáticos.

Per otru llau, tamién va llevar a la Cámara'l futuru del suelu que se lliberará una vegada concluya l'esmantelamientu de la central térmica del Narcea, en Sotu de La Barca (Tinéu), dempués de que Confederación Hidrográfica cuestionara la posibilidá d'usos industriales, alegando la inundabilidá del terrén. Vallina aseguró qu'esa posición de la entidá xestora de les agües d'Asturies "nun ye de recibu", yá que nesos terrenes va caltenese una central de tresformamientu eléctricu y pola regulación del ríu con dos banzaos que dexaríen evitar aveníes inclusive en situaciones adverses.

Un xulgáu de Familia p'Avilés.

Ángela Vallina desplicó que tamién va preguntar al Gobiernu sobro la posibilidá de dotar a Avilés d'un xulgáu de familia específicu, al igual que los que yá operen n'Uviéu y Xixón. Pa la diputada, la inesistencia d'esti xulgáu específicu ta provocando importantes problemes, con un volume de trabayu pal que nun se cunta colos abondos recursos y con diferencies en sentencies pa casos similares nos llugares onde sí esiste'l xulgáu específicu.

Tocantes a la situación presupuestaria xeneral, Vallina señaló la necesidá de conocer d'ónde se pretende detraer los recursos que s'implementen pa dar respuesta a los retos de la nueva crisis provocada pol conflictu n'Ucrania. Sía que non, señaló esi cambéu de fines de los presupuestos nun puede afectar a los servicios y prestaciones de calter social.