Menu

Ovidio Zapico reclama al Executivu asturianu que sía esixente por que lleguen fondos “a embute” que dexen resolver les grandes faltes y convertir esti mediu de locomoción en pieza clave pa una movilidá sostenible

Izquierda Xunida pidió güei l'impulsu del ferrocarril como un mediu de tresporte sostenible y de futuru, tantu en cercaníes como en mercancíes. El diputáu y coordinador xeneral de la formación, Ovidio Zapico, refugó güei los globos-sonda del Ministeriu de Tresporte sobre una hipotética supresión de servicios en llínees deficitaries y defendió la rentabilidá social y medioambiental d'un mediu de locomoción pal que pidió más inversiones: "fainos falta tar tolo firmes, xuníos y tolo esixentes que podamos énte'l Gobiernu Central por que eses inversiones que precisamos y qu'agora yá se cuantifiquen lleguen, pero tienen que llegar por raudales a Asturies pa poder revertir la situación actual",

Zapico llevó güei al Plenu de la Xunta Xeneral la situación del ferrocarril, pal que pidió "un esfuerzu inversor bien importante" pa poder revertir les consecuencies de la falta de compromisu presupuestariu a lo llargo de la década del gobiernu de Mariano Rajoy, xuna etapa na que, denunció, "hubo un abandono total sobro les cercaníes nel nuesu país y, cuantimás, con especial fuerza, nel norte y n'Asturies".

La medría d'inversiones previstes pol Gobiernu Central ye, sicasí, insuficiente una y bones, llamentó Zapico, namái ta sirviendo,"a dures penes pa tapar parches, pa tapar déficits hestóricos que tábamos careciendo".

Por eso, si de verdá pretende revertise la situación, ye imprescindible, a xuiciu del coordinador xeneral d'IX, un impulsu decidíu pa llograr "uns contorna estructural" con capacidá pa desdoblar el tramu Xixón-Noreña, soterrar les víes en Llangréu, suprimir la petrina ferroviaria d'Avilés, o resolver el plan de víes de Xixón.

Ovidio Zapico aseguró que, amás, ye necesariu'l respetu a les cercaníes, con midíes qu'aseguren que l'usuariu pague'l so billete y póngase fin a actos incívicos: "precisamos interventores, taquilles, tornos y nun precisamos ruíu nin globos-sonda". Y ye que, añedió'l diputáu, "nunca podemos midir al tren nun meru costu económicu: el tren ye un serviciu públicu, que ye social, que vertebra'l territoriu, que cohesiona Asturies y que, amás, ye un gran aliáu contra'l cambéu climáticu porque amenorga les emisiones de CO2. Non podemos midir solamente en númberos simples".

Frente a ello, el parllamentariu apostó poles cercaníes que, señaló, supón un modelu de tresporte nel qu'hai "enforma que ganar". Pero, amás, tamién señaló la necesidá d'intervenciones pa llograr unes conexones eficientes colos puertos, el corredor atlánticu y col futuru puertu secu de Llión. "N'España, tán movilizándose en redol a un 4, un 5 per cientu de los contenedores pol tresporte de mercancíes ferroviariu, casi un 18% n'Europa: tamos enllancaos, ente qu'hai países qu'últimamente tán, inclusive, como Dinamarca, quintuplicando'l númberu de mercancíes que mueven añalmente al traviés del tren".

Ovidio Zapico recordó qu'Europa pretende llegar a 2050 como un continente neutru" tocantes a emisiones y pallo, aprofió, tamién ye necesario actuar en redol a la movilidá y el tresporte. "Ta perfectamente demostrao que les mercancíes ferroviaries tienen menos costu medioambiental, enerxéticu y tienen, tamién, menos siniestralidá".

Sicasí, a pesar de toles ventayes, la realidá ye que'l ferrocarril y, especialmente, el tresporte de mercancíes, ye, d'acordies con Zapico, una "asignatura pindia" na que, añedió, "poco que nos apliquemos, tenemos enforma qu'avanzar y que ganar".