Menu

Alejandro Suárez reprocha'l paralís del Conceyu, incapaz de llevar alantre'l tresformamientu de la ciudá

Izquierda Xunida va defender nel próximu Plenu que se plantegue de forma definitiva una propuesta pa la unificación de les sedes xudiciales na ciudá d'Uviéu. La vocera parlamentaria, Ángela Vallina, y l’ex conceyal nesa ciudá, Alejandro Suárez, reclamaron güei en rueda de prensa la necesidá de decidir, tres décades, l'allugamientu definitivu pa l'alministración de xusticia que, tendrá de realizase nel marcu del plan d'usos de los terrenes ocupaos pol antiguu Hospital Universitariu Central d'Asturies. Con esti fin, la formación rexistró una moción qu'encamienta al Gobiernu a avanzar, amás del allugamientu, el calendariu d'execución y la inversión necesaria.

Ángela Vallina recordó la caótica situación de l'alministración de xusticia, estremada en seis allugamientos distintos y distantes ente sí, daqué que, al so xuiciu, "nun favorez la bona calidá del serviciu". Trátase, reprochó, d'un problema vieyu. Y, a pesar d'ello, la situación sigue ensin resolvese. La diputada esplicó que la Conseyería de la Presidencia, tien pal so analís, dende va meses, un estudiu del Colexu d'Arquitectos sobre la cuestión polo que, enfatizó, "nun esiste nenguna razón por que la solución definitiva nun pueda tomase nos meses que queden d'equí hasta final d'añu, nesta llexislatura. Por eso tamos pidiendo al Gobiernu que lu tome y que nos la cunte".

El problema de la dispersión de les sedes xudiciales conozse desque va venti años entró en serviciu'l Palaciu de Xusticia d'Uviéu que la ministra d'entós, Margarita Mariscal de Gante nun quixo inaugurar porque-y daba vergüenza.

Asturies asumió la competencia de Xusticia va quince años, y dende entós ye consciente del problema de la necesidá d'unificar les sedes xudiciales. Esiste un estudiu que llevó a cabu'l Colexu d'Arquiteutos d'Asturies sobro esta cuestión que yá lleva meses enriba de la mesa de la Conseyería de la Presidencia. Poro, nun esiste nenguna razón por que la solución definitiva nun pueda tomase nos meses que queden d'equí a final d'añu. Y por eso precisamente tamos pidiendo-y al gobiernu que lu tome y que nos la cunte, a nós y al conxuntu de la ciudadanía.

Pa Vallina yá se perdió demasiáu tiempu, con propuestes distintes en llugares diversos de la ciudá: "toles opciones lleven estudiándose dende va años, toes tienen los sos pros y los sos contras y, que nós sepamos, eses son les alternatives posibles, d'ende la moción y l'entruga al Gobiernu. Que nós sepamos, nun esisten más alternatives. Poro, nun esisten escuses pa nun tomar una decisión primero qu'acabe l'añu por que pueda executase ensin falta na próxima llexislatura, acometiendo pa ello toles inversiones que sían necesaries".

Na moción, y conectada con esta propuesta, IX tamién va apellar al Gobiernu sobro'l Plan del Cristu. L'oxetivu, reclamar información sobro les actuaciones previstes nos terrenes qu'ocupaba l'antiguu HUCA. "Tamos seriamente esmolecíes poles noticies que se publicaron apocayá y que vienen dicir que dempués de cinco años, les alministraciones implicaes nun fueron capaces de ponese d'alcuerdu nun proyectu d'ordenación d'esi espaciu, que ye esencial pa Uviéu y esencial p'Asturies"

La intervención nel Cristu supondría una actuación nun total de 260.000 metros cuadraos, asitiaos nel corazón d'Uviéu y trátase d'una pieza clave na vertebración de la ciudá y que pertenez a cuatro propietarios que son el Principáu d'Asturies que tien un 41 per cientu del total, l'Institutu de la Seguridá Social, que tien el 28.5%, el Ministeriu del Interior con 16.5% y Conceyu d'Uviéu col 14 per cientu. Poro, concluyó Vallina, teniendo en cuenta que tolos propietarios son alministraciones públiques "nun ye nin medio normal que nun se pongan d'alcuerdu eses alministraciones porque dalgunes quieran faer caxa con esos terrenes como nos vieyos tiempos".

Polo pronto, Vallina alvirtió'l refugu a cualquier operación urbanística ayena a los mesmos intereses del desenvolvimientu d'Uviéu y d'Asturies: "nun puede tolerase que s'especule con terrenes públicos. Y queremos saber, queremos que'l Gobiernu esplíquenos quién ta boicotiando un proyectu esencial p'Asturies y p'Uviéu y por qué. Quién quier faer caxa con esto y, sobremanera, que tien previstu faer el gobiernu pa evitar qu'eso pase".

Un Conceyu paralizáu

Alejandro Suárez xustificó la iniciativa énte'l paralís d'Uviéu no relativo a los sos grandes proyectos y que, enfatizó, son tamién d'interés p'Asturies: "siguen esactamente igual qu’hai 15 años y repasando les noticies d'aquellos años, y de dellos posteriores, permanentemente dicíase que'l Cristu yera importante pa la ciudá, que teníamos que tener un plan, que se diba a evitar la especulación, permanentemente anunciábense inversiones; lo mesmo pasaba coles sedes xudiciales. Inclusive se refugó'l Cristu como allugamientu, a la propuesta d'IX, de toa esta Ciudá de la Xusticia que nel so día llanzamos. Por tanto, vamos reactivalo al traviés del Grupu Parlamentariu al traviés d'Ángela como voceru; vamos intentar que les alministraciones públiques fáiganse reales pa la xente, que la xente pueda entender que sirven pa tresformar les sos vides".

La reordenación de los antiguos terrenes hospitalarios son una pieza clave nel tresformamientu del Cristu y una vieya demanda de los sos residentes, recordó Suárez, pa quien ye imprescindible tener en cuenta qu'el so resolvimientu tien tamién importancia dende la perspectiva autonómica. Por eso,al so xuiciu ye imprescindible un alderique, especialmente si tenemos en cuenta'l paralís municipal. "Tenemos un Conceyu deteníu nel tiempu, naquel tiempu. Por tanto, dende Gabino de Lorenzo, pa bien y pa mal, nun se tresformó esta ciudá. Lo que queremos ye asitiar un problema políticu d'impulsu del Conceyu, d'incapacidá política pa liderar el tresformamientu d'Uviéu nun momentu en qu'Asturies precisa el so capital y precisar de forma capital".