Menu

La formación refugó güei ampliar a xunetu'l periodu de sesiones pa torgar la tramitación d'un testu que va dexar l'apertura de granxes d'hasta 600 gochos en núcleos rurales ensin estudiu d'impactu ambiental.

Izquierda Xunida va oponese por “tierra, mar y aire” a la Llei de Calidá Ambiental. Güei escenificó esta posición al refugar la propuesta del grupu socialista p’ampliar a xunetu'l períodu de sesiones del Parlamentu Autonómicu, aldericada esta mañana na Xunta de Voceres. La vocera, Ángela Vallina, y el diputáu Ovidio Zapico, esclariaron que se trata d'un cambéu normativu lesivu y que nun van facilitar la so tramitación. “Ye una llei dafechu regresiva, tamos diciéndolo mientres los últimos díes bien de vegaes: una llei regresiva pal mediu ambiente y una llei qu'asitia otra vegada a Asturies prácticamente nos años 70, que nos alloña d'esa marca calidable d'Asturies Paraísu Natural”.

Y ye que, de salir alantre la llei qu'impulsa'l PSOE col beneplácitu de les dereches, de FADE y Cámares, van suprimise mecanismos indispensables pa la protección medioambiental. “Podría ponevos bien de exemplos de lo que significa eso qu'ellos llamen proyectos con pequena afección medioambiental: significa qu'agora, por casu, al llau de la casa de cualesquier, nun núcleu rural, podría instalase una granxa con 600 gochos, que pequenes canteres podríen abrir, qu'antenes de telefonía móvil podríen asitiase onde fora, qu'hasta 50 hectárees de plantíos d'ocalitos… a cencielles con un trámite énte un Conceyu con una mera declaración responsable”.

Pal coordinador xeneral d'IX, les implicaciones d'esta llei supon, amás, xugar cola salú pública de los asturianos al relaxase les midíes de prevención. “Poro, pa combatir esa llei que tienen apautada, que nun me quepe nenguna dulda, con Ciudadanos, afalaos pola Cámara de Comerciu, nós, evidentemente, vamos faer tolo que tea na nuesa mano y tolo que'l reglamentu déxenos a faer. Nesti casu, dexa oponese a habilitar xunetu y van tener qu'esperar a setiembre pa poder siguir aprobando una llei que ye por demás regresiva”.

Planificación enerxética

Izquierda Xunida va llevar al próximu Plenu una interpelación sobro planificación enerxética. L'oxetivu, según Ángela Vallina, ye conocer los planteamientos del Gobiernu al respective de la ordenación de la enerxía nos planes del Gobiernu del Principáu,

Per otru llau, va presentase una entruga sobro les midíes en marcha o prevista pa prevenir la medría de los delitos contra la llibertá y la indemnidá sexual. La vocera d'IX xustificó la oportunidá de la cuestión pol aumentu, entre otros, de les violencies grupales. “Queremos saber qué dispositivos tien previstu'l Gobiernu pa garantizar esa llibertá de les muyeres, dientro de les sos competencies, y tamién cuálos pide a otres alministraciones”.

Ángela Vallina remarcó, amás, la necesidá de realizar un estudiu que dexara identificar “zones escures”, en referencia a llugares peligrosos coles mires de poder tomar midíes qu'embriven los riesgos.