Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

28/06/2022

IX ufierta un pactu progresista pa lo que resta de llexislatura pa evitar el xiru a la derecha del Gobiernu

Ovidio Zapico reprocha al Gobiernu la contaminación de les sos decisiones por lobbies empresariales, nuna deriva que pon en cuestión el pactu de investidura

Izquierda Xunida escenificó güei el malestar pola deriva del Gobiernu escontra posiciones próximes a los lobbies empresariales, aprovechando la correa de tresmisión de Ciudadanos, magar se tienda la mano al equipu d'Adrián Barbón pa tratar de salvar lo que queda de llexislatura con un pactu "progresista" que dexe aprobar el presupuestu pa 2023, impulsar los Fondos Europeos, desbloquiar los Servicios Sociales, defender la industria y el mediu ambiente. Dos preguntes d'Ovidio Zapico al vicepresidente, Juan Cofiño, desvelaben yá nel so enunciáu la crisis pola que traviesen les relaciones de la formación col PSOE. Asina, en dos tales cuestiones sobro la Llei de Calidá Ambiental y sobro el refugu d'IX a la influencia de lobbies na actividá y decisiones del Executivu rexonal, el diputáu y coordinador espetaba al númberu dos del presidente: "¿da per rotu l'alcuerdu con IX?".

Nun alderique especialmente agriu per parte de Cofiño, Ovidio Zapico anunció que la so formación sigue abierta al diálogu, inclusive pa l'aprobación de los presupuestos, partiendo si fuera necesario de l'astención, dada la importancia de les cuentes de 2023 de cara a la xestión de los Fondos Europeos. Eso sí, reclamó un cambéu de camín a la izquierda y pidió que se retire la Llei de Calidá Ambiental.

La acritud del vicepresidente fixo que Zapico llamara a Cofiño a dexar de llau "ataques personales" y centrar l'alderique en cuestiones polítiques. Sí, afirmó'l diputáu, "tamos en campaña", pero esclarió que non la electoral, sinón contra la llei de Calidá Ambiental, que'l so testu supon romper "l'equilibriu" qu'hasta agora esistiera n'Asturies na materia, compaxinando intereses y actividaes particulares cola debida protección de la redolada.

Frente a la posición colos lobbies empresariales, colos que'l Gobiernu caltuvo alcuentros pa encetar la nueva lexislación medioambiental, Zapico reprochó que nun se trató, tamién, d'escuchar a les organizaciones ecoloxistes y conservacionistes.

La derechización del Gobiernu demuéstrase tamién, según el coordinador xeneral d'IX Asturies, na guerra contra la burocracia cola que se trata de xustificar les declaraciones responsables coles que se pretenden ventilar la concesión de permisos pa delles actividaes que, hasta agora, esixíen un estudiu d'impactu, como pudiera ser l'apertura d'una granxa de gochos d'hasta 600 animales al llau d'un núcleu rural. Sicasí, el colapsu nos Servicios Sociales nun llevó al executivu a responder con igual contundencia, a pesar de que son miles les families que tán pindies d'ayudes dependientes de l'Alministración del Principáu.

La tensión siguió na segunda parte del alderique, na que Zapico aportunó en qu'hai grupos d'interés empresarial que tán "contaminando" l'acción del Gobiernu, na Llei de Calidá Ambiental y, entá antes, na de Midíes Urxentes, qu'amás va xenerar otros efectos negativos adicionales, al treslladar parte de les responsabilidaes a los Conceyos. Frente a lo qu'asocede n'Asturies, el coordinador xeneral d'IX aludió al últimu paquete de midíes del Gobiernu de coalición n'España y les declaraciones del Presidente Pedro Sánchez, nel sentíu de que l'executivu central yera "incómodu" pa sectores de presión empresariales. N'Asturies, Ovidio Zapico, lo que se ta produciendo ye un deslizamientu precisamente escontra esos mesmos sectores con intereses particulares y ayenos a los xenerales de la ciudadanía, al traviés de la Cámara de Comerciu d'Uviéu, cola correa de tresmisión de Ciudadanos.

Volver

Compartir

2014 Izquierda Xunida d'Asturies - Política de privacidad - Política de cookies