Menu

IX va buscar nueves aliances pa oponese a una reforma lexislativa contestada socialmente y lesiva pal medioambiente

Ovidio Zapico y Nuria Rodríguez axuntáronse güei con representantes de les organizaciones pesqueres d'Asturies nel procesu pa "texer" aliances frente a una reforma lexislativa contestada socialmente y lesiva pal medioambiente, pero tamién pa los sectores tradicionales primarios

La llei de calidá Ambiental que promueve el Gobiernu d'Asturies cuerre'l riesgu de llancar, nesti casu, énte la marexada que ta provocando na flota pesquera asturiana, que tarrez que la nueva norma, defendida con especial interés pol vicepresidente Juan Cofiñu, acarrete graves perxuicios pal sector. El diputáu y coordinador xeneral d’ IX Asturies, Ovidio Zapico, y la tamién parlamentaria de Podemos Asturies, Nuria Rodríguez, entrevistáronse güei con representantes de les confreríes de pescadores d'Asturies y restu d'organizaciones del sector pesqueru, que formen parte de la Plataforma Manifiesto de Burela en defensa del Sector Pesqueru del Cantábricu – Noroeste, nuna xunta na qu'encetaron los riesgos que s’abren de resultes de la nueva lexislación, que puede tener consecuencies pa les cales de pesca.

El presidente de la Federación de Confreríes d'Asturies, Adolfo García, manifestó, tres l'alcuentru, el so malestar pol anteproyectu de llei que, al so xuiciu, pon en peligru a la flota asturiana, especialmente, hai enfatizado, "nel artículu 33".

Como primer pasu, tres esta cita, García anunció que "tol sector pesqueru asturianu" va poner en contactu con tolos grupos políticos de la Xunta Xeneral p'aldericar esta reforma y, alvirtió, "de nun haber cambeos sustanciales referentes, sobremanera al artículu 33, va tener la oposición frontera de tola flota".

Esta xunta, esplicó Zapico, inscribese na fueya de ruta puesta en marcha por Izquierda Xunida frente a la Llei Cofiño, oficialmente denominada calidá Ambiental. "Somos xente serio y de palabra y diximos que díbamos torgar, que díbamos a oponenos a que'l Parlamentu trabayara en xunetu pa tramitar una llei que va en contra del interés xeneral, pero qu'eso nun quería dicir que nun fuéramos trabayar, y tar faciendo: llevamos tol branu trabayando pa texer aliances sociales contra la Llei de calidá Ambiental del señor Cofiño".

Nesa busca de sofitos al refugu d'IX, el diputáu recordó cómo empecipiaron el procesu col respaldu de Comisiones Obreres (CC OO), al que siguió'l consensu colos movimientos conservacionistes y ecoloxistes, alcaldes d'IX, más tarde secundaos pola mesma FACC y, agora, pol sector pesqueru. A la vista d'esta concatenación de suspensos a la Llei, Zapico reivindicó un cambéu de camín nel Executivu rexonal . "Más allá de l'actual aritmética que pueda haber na Xunta Xeneral, el Gobiernu d'Asturies debería de reconsiderar la so posición al respective de esta llei porque hai una mayoría social apolmonante que se manifiesta en contra".

Sía que non, el coordinador xeneral alvirtió de que la so formación nun se va quedar de brazos cruzaos: "vamos siguir sumando sofitos, vamos siguir buscando aliaos sociales en contra d'esti proyectu; queda branu per delantre pa faelo".

La mariña asturiana en peligru poles "eóliques offshore"

El malestar del sector pesqueru ta, según Nuria Rodríguez, más que xustificáu: "si yá nun teníen abondo con eses exigües cuotes pesqueres que-y pertenecen a la flota pesquera asturiana, pos agora atópense con un anteproyectu de llei calidable Ambiental que pretende industrializar tola mariña asturiana y afectar gravísimamente a les cales y a la manera de vida de los y les pescadores, de toles sos families, de toles Confreríes y, a última hora, de tola flota".

Pa la diputada, el cambéu lexislativu amerita falar de "llei de precariedá ambiental" una y bones, dixo, "non solamente ye xuna declaración d'intenciones, sinón que yá pudimos comprobar cómo hai grandes empreses eléctriques que tán interesaes n'industrializar, cueste a quien cueste, les mariñes asturianes y que tenemos miembros del Gobiernu, nesti casu, la directora de Minería y Enerxía (Belarmina Aguado), qu'allega como una convidada más a esos simposios que dan, nesti casu, empreses como Iberdrola que yá tienen programada de qué manera van instalar la eólica offshore a la que llamen, curiosamente instalaciones esperimentales. Esactamente'l mesmu términu al que se refier esta llei de precariedá ambiental, nel so artículu 33".

Ello ye que según Nuria Rodríguez, la reforma llegal va abrir vacíos llegales que van xugar en contra de los intereses d'Asturies frayando los derechos de la ciudadanía lo mesmo que de los sectores primarios. Amás, eses brigueres, al so xuiciu, pueden emponer la desapaición d'esi sector primariu polo que, adelantró, "dende Podemos Asturies ya IX vamos siguir a la griesca por qu’esta llei sía tornada por que'l Gobiernu d'Asturies empiece faer lo que tien que faer, que ye defender a los asturianos y asturianes"