Ángela Vallina, que denuncia'l malestar del colectivu investigador, alvierte qu'esti nuevu ente namái va poder cumplir oxetivos con un financiamientu abondu
Izquierda Xunida espera que la futura Axencia de la Ciencia, Competitividá Empresarial ya Inovación Asturiana sirva como revulsivo pal impulsu de la investigación. La vocera de la formación, Ángela Vallina, anunció esta mañana nel Plenu'l so votu favorable, "cola esperanza de que cuando se ponga en marcha nun volvamos tener nunca más noticies como la d'antesdayeri na que les y los investigadores denuncien qu'hai dineru pa pagar xestores, pero non pa estabilizar a les y los científicos que tán trabayando na nuesa Comunidá Autónoma".
La diputada aprovechó l'alderique sobro'l dictame de la Comisión del Proyectu de Llei pa la creación d'esti organismu, pa llamar l'atención sobro'l malestar y “hartazgo” del personal investigador. Frente a ello, Vallina aportunó na necesidá d'un sofitu decidíu a la investigación científica nos sos distintos campos como "pilastra fundamental" de cualquier política pública pola so capacidá p'ameyorar la calidá de vida y bienestar de les persones al traviés de l'ampliación de la conocencia y de la innovación, al favorecer el desenvolvimientu social, económicu impulsando'l progresu y el bienestar colectivo. L'Axencia, señaló la parllamentaria, ye pos un complementu ideal pal oxetivu qu'animó la creación de la Conseyería de Ciencia que, enfatizó, "nun ye otru que l'esplegue d'una política científica rexonal estable, y una estratexa afayadiza, pa sofitar el notable capital científicu de la rexón y avanzar p'asitiar al Principáu d'Asturies na vanguardia de la ciencia". Tratase d'un horizonte que, al traviés d'esti preséu, tien de sirvir, a xuiciu de la vocera d'IX, pa contribuyir a diseñar y executar polítiques públiques nel ámbitu de la investigación, el desenvolvimientu tecnolóxicu y l'innovación. "Y tien que llograr qu'eses polítiques d'I+D+I que se diseñen contribuyan al tresformamientu y meyora del texíu empresarial ya industrial y del sistema granible asturianu, y que dexen avanzar, tal que diz la llei escontra un modelu de crecedera sostenible, resiliente, competitivu, dixital ya integrador que garantice la crecedera, la diversificación y la competitividá económica", añedió.
Pa Izquierda Xunida, esta axencia tien d'impulsar les necesaries medríes d'inversión n'I+D+im superando cuanto antes esa meta de destinar el dos per cientu del Productu Interior Brutu a la investigación. Esti preséu, sollertó Ángela Vallina, "nun va poder cumplir los sos oxetivos por enforma que s'esforcien los sos responsables si nun va acompañada d'un esforcio inversor n'I+D+i que non yá tien que venir del ámbitu públicu sinón nel que tienen que participar los axentes privaos, particularmente les empreses".
Pa concluyir, Vallina reconoció que nel trámite, el proyectu superó defectos como'l de la FICYT. Agora, aportunó la diputada, "esperemos que (l'axencia) venga dotada tamién económicamente porque, sinón, nun vamos faer nada"
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies