Menu

Ángela Vallina y Cristina Pontón reprochen la mala educación de Canteli y el so comportamientu "de ciertu matonismo" y "cercu" pa cola institución académica, favoreciendo los ataques al rector

Izquierda Xunida presentó güei una Proposición non de Llei pa refiertar el cercu a la Universidá d'Uviéu favorecíu pol Alcalde Alfredo Canteli. La vocera d'IX na Xunta Xeneral, Ángela Vallina, y la ex conceyala ovetense Cristina Pontó, refartó esta mañana al rexidor polo que consideren una actitú que cadez de los mínimos rudimentos de la bona educación. Con esti fin, esta iniciativa pretende que'l Parlamentu asturianu asítiese y refugue "nítidamente" los comportamientos y actitúes de violencia verbal que s'emplegaron apocayá contra'l Rector de la Universidá d'Uviéu".

La PNL reprocha, amás, les declaraciones de Canteli por culpa de que "paecen afalar los insultos recibíos pol Rector".

A lo último, encamiéntase al Gobiernu d'Asturies por que s’adopten "toles midíes necesaries" pa garantizar la integridá del máximu responsable de la institución académica, y asegurar el respetu a l'autonomía universitaria frente a cualquier ataque".

Uviéu, coincidieron Vallina y Pontón, nun se merez un rexidor que sía incapaz de representar con un mínimu d'educación al conceyu. Pa la vocera d'IX, les declaraciones de Canteli "salen del papel y del comportamientu que tien que tener un Alcalde de respetu escontra la ciudadanía y, sobremanera, si nós pidimos que se respete l'autonomía municipal, que supongo que'l señor Canteli tamién lo pide y deseya, tien qu'aprender tamién a respetar l'autonomía d'otres entidaes, d'otros organismos, como ye, nesti casu, la Universidá d'Uviéu que va actuar según los mesmos intereses de la Universidá, non según los intereses del Conceyu porque, hai que recordar que la Universidá ye de toa Asturies, de tola ciudadanía asturiana y non solamente ta n'Uviéu: ta tamién n'otros territorios d'Asturies".

Cercu a la Universidá

Ángela Vallina refugó qu'esista un acosu a la capital. Al contrariu, más qu'un cercu a Uviéu lo que sí hai, enfatizó, "ye un cercu a la Universidá per parte del Alcalde". La diputada encamentó al rexidor un cambéu d'estratexa y que pasie polos barrios nos que, aseguró, la xente protesta y comenta por un deterioru del cuidu y llimpieza de les cais, nunca vistu. El so llabor, criticó, "dexa abondo que deseyar: ende tenemos el Paséu de Los Álamos, que foi incapaz, en cuatro años, d’iguar".

Lo peor, según la parllamentaria, ye que les declaraciones de Canteli fomenten la crispadura. "Yo nun sé si ye por ser independiente, si ye la nueva actitú del PP, pero esto paez un comportamientu de ciertu matonismo: nun puede un rector dir pola cai por cuenta de tar siendo afrelláu verbalmente y cualquier día d'otra manera".

Cristina Pontón, que quixo manifestar el sofitu d'IX al Rector, Ignacio Villaverde, foi especialmente crítica con una actitú del Alcalde que topeta, frontalmente, cola bona imaxe que tendría d'ufiertar de la ciudá'l so máximu responsable. El rexidor, llamentó la ex conceyala, "nun pierde la oportunidá de falta-y al respetu a instituciones, colectivos, vecinos. Desgraciadamente, tenemos un Alcalde que lleva cuatro años falando de capitalidá; enllénase-y la boca cola palabra capitalidá, pero nun da'l primer pasu, que tenía que traelo de casa, que ye la bona educación por qu’esi Alcalde, esi Rexidor, tea acorde cola capitalidá que ta reclamando".

Pa la ex edil uvieína, si hubiera un ranking d'alcaldes irreverentes, Canteli va muncho tiempu que dexara en bien mal llugar hasta a Jesús Gil. "Nun podemos siguir teniendo un Alcalde fondiáu nel medievu si lo que queremos ye tener un Uviéu del Sieglu XXI”.