Menu

La diputada alerta del aumentu d'asesinatos de muyeres y amiesta la medría del maltratu a la involución que s'impulsa dende la estrema derecha.

Izquierda Xunida sollertó del aumentu de la violencia machista y pidió el compromisu de toles fuerces democrátiques pa refugar mensaxes negacionistes. La vocera de la formación na Xunta Xeneral, Ángela Vallina, aseguró qu'esta medría guarda una correlación con una involución auriada dende posiciones ultraconservadores. “Toi convencida de qu'esi amontu de la violencia contra les muyeres y la violencia contra los sos fíos a manos de les sos pareyes y ex pareyes tien que ver col negacionismu que practiquen dellos grupos políticos ya ideolóxicos que, na so guerra cultural contra los valores de la igualdá y la democracia, que permanentemente vilipendien y faen de menos, contribuyeron a embrivir la gravedá d'atentar contra una muyer porque aportunen n'afalar la xustificación de la desigualdá”.

Vallina llevó güei al Plenu de la Xunta Xeneral una iniciativa pa conocer les midíes que se tán poniendo pa enfrentar la lacra de la violencia machista y denunciar la situación de riesgu na que viven demasiaes muyeres. “N'Asturies, producense a la selmana cuatro nuevos casos de maltratu contra una muyer pola so pareya o ex pareya. Dalgunes d'eses muyeres acaben precisando ordes protección policial, en dellos casos hasta permanente, pa embrivir el riesgu de ser asesinaes”, llamentó, de la que se preguntó qué asocedería si esta sangría se cebare notros colectivos: “Si en llugar de ser muyeres asesinaes por homes fueren atentaos terroristes, fueren militares o políticos los asesinaos, imaxínense ustedes la que se montara nesti país”.

La violencia estructural contra les muyeres esplica tamién, a xuiciu de Vallina, la fienda salarial, claru esponente d'un modelu que ye necesariu superar. “Y esa desigualdá implica dominación: quieren a la muyer sumiso y sometío, porque nesa la so ideoloxía intolerante ya intolerable, el fuerte tien de someter a la persona débil. Pero nuna sociedá avanzada, esa ye una ideoloxía supremacista que tien de ser combatida.