Menu

Ángela Vallina reprocha la falta de tresparencia, esixe alloñar a los lobbies enerxéticos y anuncia que la formación va priorizar les árees europea, industrial y medioambiental

IX reivindicó güei nel Plenu abrir el diálogu p’alcordar una estratexa "común" sobro fondos europeos que ponga fin a una llexislatura d'opacidá y una primacía de proyectos venceyaos a los grandes conglomeraos enerxéticos, sofitaos, cuando non impulsaos, dende la Conseyería d'Industria. La vocera parlamentaria, Ángela Vallina, quien sollertó de qu'un destín equivocáu puede terminar per perxudicar l'interés de la rexón, aprovechó la entruga al presidente p'aportunar na necesidá de repensar l'usu d'esti financiamientu européu que, alvirtió, ye más que dineru: "debe de ser la palanca p'asegurar el futuru de la nuesa Comunidá ".

La entruga, esplicó la diputada, llega por culpa de que, nestos casi cuatro años, faltó tresparencia y consensu: "nun compartimos aspeutos importantes del planteamientu xeneral sobro la xestión y el destín d'esos fondos, como l'escesivu pesu de los sectores enerxéticos nel so diseñu, que nun respuende a les necesidaes de futuru d'Asturies, sinón a los intereses de dalgunos d'apoderase del rendimientu económicu de los fondos públicos, sobremanera de les grandes empreses d'enerxía que, nun escaezamos, estan obligaes a faer esa transición ecolóxica y tienen dineru de sobra".

La opacidá y la cerrazón por privilexar estes inversiones, señaló Vallina, "fainos resabiar de l’área industrial y enerxético del so Gobiernu, pos s'asitia nel epicentru d'esti conglomeráu, que los sos intereses nun son los d'Asturies y el so texíu económico, porque nin tien un planteamientu de xeneración d'empléu, nin ta comprometíu cola nuesa tierra, sinón coles sos xuntes d'accionistes".

Según la vocera d'IX, na repartida de los fondos europeos, enfréntense dos formes d'entender Asturies y el so futuru. Pel momento, criticó, "quien ganen son los conglomeraos industriales y los sos intereses, que, repito, son ayenos a los de la Comunidá que, ello ye que puede vese estropiada por una estratexa errónea".

La visión opuesta sobre cómo favorecer la rexeneración económica tien de combatise cola apertura d'espacios que favorezan el diálogu y, nesti sentíu, recordó que na cultura política d'IX ta'l pactu inclusive cuando "les coses tán peor y non yá cuando les postures tán más próximes".

Vallina esplicó que la formación lleva cuatro años pidiendo cambeos na xestión de fondos y, avanzó, "eso nun va terminar porque termine la llexislatura. En cuestión de meses, va tener qu'encetase, nuevamente". Por eso, preguntóse, "qué sentíu tien quedase paraos, aplazando un asuntu que, dambos saber, va formar parte de les llínees d'acción prioritaria, siquier para Izquierda Xunida, del nuevu Gobiernu y del nuevu Parlamentu que surdan tres les elecciones de mayu".

La vocera d'IX aprovechó xunas declaraciones del presidente Adrián Barbón, nes qu'aseguraba que'l deceniu 2023-2033 va suponer un períodu de tresformamientos, para convidar a empezar yá a trabayar na busca de consensos. "Usté anuncia xuna década de cambeos, nós queremos empezar a dibuxala yá, sabiendo que la pluralidá de la esquierda va esixir, inevitablemente, diálogu y lo que güei-y digo mañana volveremos plantegalo en cualquier mesa de negociación: queremos xuna xestión clara, política y democrática d'esos fondos europeos; queremos tresparencia n'un área industrial que nós entendemos ta demasiao pindiu de los intereses enerxéticos y que creemos que ta comprometiendo cola so opacidá los intereses xenerales d'Asturies y de la so ciudadanía". Ello ye que abondó Vallina, "de tolos fondos qu'ustedes dieron yá y que se suponen que tán n'execución, que desconocemos, nun sabemos, tampoco, cuántos puestos de trabayu creáronse, pero non por obra, sinón de futuru, porque esta yera la oportunidá de nuevos nichos d'empléu y de un nuevu treme económicu para Asturies".

Frente a la falta de tresparencia, la diputada pidió "implicar" a la Cámara al igual que yá pasa notres comunidaes. "Hai que ser más democráticu y más abiertu". La definición y xestión de los fondos, señaló Vallina va ser prioritaria pal so grupu: "como dirixente d'IX dígo-y que vamos asitiar l’área europea ya industrial, según la medioambiental, nel centru d'esa década de cambéu que foi anunciada. Si non, ¿qué ye'l cambéu? ¿en qué s'afigura? Non en concencia nel continuismu, na inercia que, lamentablemente, y más allá la COVID o la guerra, foi la tónica desgraciadamente d'esta llexislatura que termina. Y digo desgraciadamente porque foi una llexislatura bien complicada".

Pal cambéu de dómina, concluyó Vallina, "fai falta y queremos una estratexa compartida y evaluada sobre los fondos europeos, na qu'esta cámara, más allá de les mayoríes de gobiernu, tenga voz para compartila y faela propia, al igual que yá pasa notres comunidaes. Precisamos y vamos defender un gobiernu distante de los lobbies enerxéticos, o de cualesquier lobby, que ye lo mesmo que venimos esixendo nestos últimos años y que nun va sosprender. Igual que n'Europa, fora lobbies".