Menu

El diputáu, qu'anunció'l votu en contra a la reforma, considera que'l nuevu marcu llegal supon un retrocesu de 50 años, frutu d'alcuerdos cola derecha na Xunta y, fora, con sectores empresariales y la Cámara d'Uviéu

Pa IX, el nuevu testu alloña al Gobiernu d'Adrián Barbón del modelu de Pedro de Silva y averase al de Rodríguez Vigil

La llei de Calidá Ambiental que güei se prevé aprobar na Xunta Xeneral va suponer un retrocesu na protección de la redolada de 50 años. Siquier esa ye la opinión del diputáu y coordinador xeneral d'IX Asturies, Ovidio Zapico, quien reprochó al PSOE la so alliniación cola derecha pa sacar alantre esta reforma, de la qu'anunció el so votu en contra. Más allá de los detalles sobre un testu que supón barra llibre pa les grandes empreses, con unos controles más laxos, inclusive con simples declaraciones responsables, el parllamentariu asitió esta norma como un elementu qu'establez, "dende güei mesmo, un marcu de relación entre dos proyectos políticos que son distintos: un PSOE que ye inmovilista, una IX que ye un proyectu de cambéu".

Y ye que la nueva lexislación medioambiental, llueñe de suponer un cambéu de dómina" supon una involución: "reculamos a los años 70, a los años más negros del mediuambiente na nuesa comunidá autónoma; aquellos años que solamente l'entamu de l'autonomía y gobiernos como'l de Pedro de Silva llograron sacar alantre. Desgraciadamente, ustedes, señoríes socialistes allóñense del modelu de Pedro de Silva y avérense, peligrosamente, al del presidente (Juan Luis) Rodríguez Vigil".

La votación, prevista pal final de la sesión plenaria, va marcar tamién, a xuiciu de Zapico, "cuál va ser el camín" si'l PSOE "tien númberos" na próxima llexislatura. "El vicepresidente (Juan Cofiño), esta mañana, daba les gracies na so intervención, tanto nesta llei como na otra, al trabayu del grupu parlamentariu Ciudadanos. Si ustedes tienen númberos la próxima llexislatura, posiblemente, yo creo que, en lleis y n'alderiques como ésti, ustedes van tar dando les gracies a Foro Asturies, porque la realidá ye que sectores empresariales, más los votos de la derecha nesta Cámara son los que tán determinando l'alderique de güei. La realidá ye qu'ustedes prefieren llexislar con ellos nesta Cámara, ente que, dende fora, manden otres cámares -n'alusión a la de Comerciu d'Uviéu-: prefieren fuxir d'equilibrios y prefieren emponer a Asturies a un retrocesu mediuambiental".

Frente a esti modelu, Ovidio Zapico defendió otru de modelu, basáu nel alcuerdu, el pactu: "el camín d'un Gobiernu, a última hora, de progresu y de cambéu, que sepa conxugar equilibrios, intereses".

La llei tamién evidencia qu'IX, aseguró'l diputáu, "ye imprescindible" para'l cambéu de dómina n'Asturies, con más pluralidá y xente común en tomar de decisiones y nel Gobiernu. "La llei alloña esos dos proyectos de los que falaba nun principiu, l'inmovilista del PSOE, el de cambéu d'IX". Y, añedió Zapico, "al empar empónnos a Gobernar xuntos nun futuru".

Esi gobiernu plural, esplicó'l coordinador xeneral d'IX, va llegar non porque'l modelu de güei sía del presto de la formación, sinón porque va ser necesaria xuna alternativa progresista. "Ustedes, mientres estos postreros 18 meses o 20 meses, construyeron un complexu empresarial y políticu opacu, que tien de ser oxetu de discutiniu y que tien que ser oxetu de superación porque ye precisamente esi complexu políticu-empresarial el que supón una estorbisa por que la política asturiana camude de dómina".

Frente a modelos rexonalistes como'l del PSOE, Ovidio Zapico reivindicó'l "autonomismu" d'IX, que, aseguró, supón un compromisu social y ambiental que güei sale feríu d'esta Cámara". Eso sí, agoró, dempués de mayu, va poder restañase'l dañu y que, dempués de mayu, "vamos llograr revertilo"