Menu

Ovidio Zapico y Rodrigo Suárez defenden potenciar el sector ganaderu como ún de los pilastres pa dinamizar el mediu rural y l'Asturies balerada

El sector ganaderu debe de ser unu de los pilastres pa la dinamización del mediu rural asturianu. El coordinador xeneral d'Izquierda Xunida y diputáu, Ovidio Zapico, aseguró esta mañana na feria de San José de Quiros, qu'esti sector debe de ser potenciáu tamién como un elementu clave nes polítiques pa dar dar respuesta a los retos demográficos, pola so capacidá pa xenerar riqueza y emplegu. Trátase, a xuiciu d'Ovidio Zapico, de da-y respuesta a déficit estructurales, pero tamién coyunturales. Nesti sentíu, refirióse a los problemes que se deriven de la inflación, por casu, con precios peraltos pa poder producir con unos marxes de beneficios dignos, o los que xenera cola alministración pola lentitú pa pagar los daños de la fauna. Ello ye que llamentó, que los tiempos por que los ganaderos puedan cobrar estes indemnizaciones, supera l'añu, pudiendo llegar en dellos casos a los 12 y 14 meses, y ella, a pesar de que s'apautara col gobiernu, hai un plazu máximu de 90 díes

“Yo creo que la ganadería merez munchu impulsu, porque ye la cazumbre que da vida al mundu rural n'Asturies. Y agora que falamos tanto de despoblación, ye bien importante tener claro qu'unu de les pilastres, que tien que siguir siendo unu de les pilastres fundamentales del mediu rural, ye la ganadería. Nesi sentíu hai que mirar más pa la demografía. Nun se fixo lo suficiente nestos cuatro años en materia demográfico. Priorizáronse otres lleis, bien contestaes por nós, como la llei calidable ambiental y, y nun s'impulsaron otres que yo creo que fueren muncho más beneficioses p'Asturies y pal so mundu rural y como como la del retu demográficu. Y nesi sentíu, aspiro a que la próxima llexislatura sía'l momentu de la demografía, y de la llei del retu demográficu y sea’l momentu de polítiques que de verdá prioricen facilitar la vida en pueblos como pue ser Quirós“.

Hai feries ganaderes como dinamizadores de l'Asturies balerada

Pela so parte, l'alcalde de Quirós, Rodrigo Suárez, amosóse esta mañana, satisfechu colos bonos númberos de la feria de San José, que convirtió al conseyu nun centru d'atracción ganaderu. Y nun yera para menos, yá que, según esplicaba, el númberu de participantes y de visitantes, creciera esponencialmente respectu anteriores certames.

Esti tipu d'actividaes, coincidía Súarez con Ovidio Zapico, son ferramientes importantes de cara a la dinamización del mundu rural. “Hubo bastante bona respuesta; foi un poco iniciativa de mió: falé colos tratantes por que vinieren con ganáu equí a la feria iOS pudiéramos potenciar un poquitín la feria. Toi bien contentu, hubo prácticamente dos vegaes más qu'otros años”.

Candidatures y confluencia

Al respective de candidatures, tanto municipales como autonómiques, Zapico amosóse satisfechu pol ritmu nel que la formación ta estenando toles incógnites pa presentase nes próximes elecciones. A lo llargo de los próximos 15 díes, según el coordinador d'IX, va haber “ bones noticies” dende la perspectiva organizativa, con anuncios como'l d'ayeri en Ribesella, sobre'l pactu con Pueblu , que se suma a los alcuerdos alcanzaos con Más Asturies, Izquierda Asturiana, o incorporaciones d'independientes, como Gaspar Llamazares en Convocatoria per Uviéu. “Vamos siguir xenerando una alternativa curiosa pal nuesu electoráu; el nuesu electoráu va tener un motivu d'ilusión pa güei allegar a votar en mayu en toa Asturies, y toi seguro de que tamién va faer lo mesmo n'Uviéu”, esplicaba Zapico en respuesta a una pregunta de los medios sobre'l procesu nes elecciones y confección de les pertinentes llistes na capital d'Asturies, daqué, no que, concluyó, quien tien la última palabra, ye la mesma organización n'Uviéu.