Menu

Izquierda Xunida de Sobrescobiu esixó güei al Alcalde la retirada del bandu qu'abre'l plazu de presentación de solicitúes pa una vivienda d'emerxencia, por culpa de que diría contra principios básicos llegales que regulen la concesión d'esti tipu de soluciones habitacionales énte situaciones sobreveníes.

Pal voceru municipal, José Guido, esti bandu ye un auténticu disparate que namái se puede entender dende la ignorancia o la mala fe. "Nun sabemos qué-y pudo pasar pela cabeza al Alcalde pa inventase un períodu pa la presentación de solicitúes pa una vivienda d'emerxencia. O nun sabe que la llei marca la concesión d'esti tipu de viviendes atendiendo a situaciones graves y sobreveníes y, poro, fora de cualquier plazu, y esto sería grave, o sabelo y, directamente, prevarica al anunciar l'apertura d'un plazu que diría directamente contra la normativa y les formes de concesión d'esti tipu de Viviendes".

Pa Guido, esti bandu inscríbese dientro d'un procedimientu que, llamenta, ye demasiao frecuente na xestión municipal de Marcelino Martínez: "lo que ta faciendo l'alcalde nun tien nengún sustentu llegal. De primeres, porque quien xestiona la concesión d'esti tipu de viviendes nun ye'l Conceyu, sinón la Dirección Xeneral de Vivienda, previu informe de los servicios sociales. Esti bandu ye una amuesa más de les práctiques caciquiles que, nesti y dellos otros ámbitos, desenvuelve l'Alcalde".

El voceru d'IX en Sobrescobiu reprochó, amás, la total ignorancia qu'amuesa l'Alcalde al aludir a una lexislación que yá nun ta vixente, sinón derogada. "Nun ye posible tener a un Alcalde tan indocumentáu, sacantes esto nun se trate d'un erru y, como dicía, forme parte de lo que foi la so práctica habitual de tratar d'esti conceyu como si fuera'l so cortixu".