Jesús Iglesias, Coordinador Xeneral d'IX d'Asturies, aseguró esta mañana que la militancia d'IX realizó un exerciciu de democracia que fortalez a la organización” y nesi sentíu dempués de que les bases falaren” la dirección d'IX ten de ponese “en posición de firmes”. Sía que non, Iglesias garantizó “la estabilidá” del Gobiernu d'Asturies yá que el motivu del referéndum yera cómo s'articulaba la fórmula de sofitu, dende dientro del gobiernu o con alcuerdos parlamentarios puntuales.
Nuna rueda de prensa na see d'IX d'Asturies, Iglesias recordó que la consulta yera venceyante, polo qu'anque refugaren la so propuesta por un únicu votu nun cabría más qu'acatar la resultancia. Participaron 1.330 y 651 votaron a favor, 664 en contra y dieciocho abstuviéronse. L'estrechu marxe que decidieron les urnes, nun dexa a xuiciu d'Iglesias “nin a los del sigo nin a los del nun dicir que teníen razón”, pos a lo sumo hai “una razón compartida”.
Iglesias esplicó que'l referendu nun trataba sobre si dar estabilidá a un Gobiernu del PSOE, sinón namá sobre unu de les maneres de da-y estabilidá: dende dientro del Executivu. Treslladó a la sociedá asturiana un mensaxe de “serenidá” porque la decisión d'ayeri “nun va quita-y estabilidá al Gobiernu. La estabilidá ye un valor en sí mesmu ya IX nun va quitar a los asturianos d'un Gobiernu estable”.
“Nun vamos echanos al monte”, dixo'l Coordinador d'IX p'asegurar que van ser posibles los alcuerdos col Gobiernu pa que tenga estabilidá.
Pa les midíes de retayos, alvirtió, según los enfoque Javier Fernández va tener que buscar el respaldu parlamentariu del PP -si ataquen a los servicios esenciales- o d'IX.
Tampoco cree Iglesias que si hubiera un referéndum sobre'l sofitu a Fernández na investidura ésti fuera refugáu, esta cuestión nin siquier taba nel alderique internu del partíu, como prueba que foi una decisión a la que naide s'opunxo na xunta del conseyu políticu del mes d'abril, ente que la entrada nel Gobiernu foi cuestionada por 35 miembros d'esi órganu esta mesma selmana.
Y nun cree coles mesmes que la resultancia del referéndum suponga un refugu a la presencia d'IX nel Gobiernu en llexislatures anteriores, daqué que, na so opinión, los electores habíen sofiao con aumentos de votos dempués de casi ocho año de gobiernu.
Iglesias nun entiende la resultancia del referéndum como un fracasu personal y cree que quien votaron por entrar nel Gobiernu nun lu fixeron por fidelidá a él, sinón en función de la propuesta.
“Yo soi un yogur con fecha de caducidá”, dixo Iglesias pa referise a la so condición de coríu coxu, como dicen na política americana", yá que dientro d'un mes va dexar el máximu cargu del partíu n'Asturies, tres doce años.
Va ser senador, según un alcuerdu ente PSOE ya IX que sí foi refrendáu pol conseyu políticu al marxe del referéndum.
Pa la elección del so sucesor deseya que cunte con un ampliu respaldu de más del 75 %, pero puntualiza que les candidatures pueden presentase hasta la celebración de l'asamblea, la última fin de selmana de xunu.
Una asamblea que ve como “l'escenariu fayadizu p'apolazar cualquier diferencia interna” y pa la que emplaza “a toles sensibilidaes a buscar elementos comunes y escoyer a la persona que más consensu concilie”.
Iglesias negó que los diputaos na Xunta Aurelio Martín y Ángel González fueren “conseyeros in péctore”, como repitió la prensa, ya inclusive apuntó que la lóxica llevara a que fueren un home y una muyer los escoyíos por IX pa un Gobiernu paritario.
