Ángel González, diputáu encargáu de los asuntos d'industria na Xunta Xeneral del Principáu, recibió esta mañana a los representantes sindicales de CCOO, UXT y USO en Alcoa a quién-yos repitió'l sofitu d'IX pa consiguir una rebaxa de la tarifa eléctrica y evitar asina la deslocalización de la empresa. Ángel González declaró que'l Gobiernu d'España tien “mecanismos pa resolver el cuadru de resultancies de Alcoa, qu'encara un 38% de costu eléctricu, debíu al preciu de la tarifa”.
Ángel González, atalanta qu'esiste un grave peligru de desapaición de l'actividá de la planta n'Asturies, por cuenta de los “peraltos costos de la tarifa eléctrica”.
Dende'l so puntu de vista, el Gobiernu d'España tien “mecanismos” pa que pueda resolvese esa cuenta de resultancies, ya que la empresa destina un 38% al costu de la enerxía pa producir, y qu'asina nun se comprometa'l so futuru”. Señaló que'l zarru o treslláu d'esta multinacional trairía consecuencies pa otros sectores, por casu el de la producción eléctrica, ya que la fábrica d'aluminiu utiliza “miles de megawatios”. “Si esa enerxía nun s'utiliza les térmiques baxaríen la so producción y podría traer el zarru de delles centrales”.
De la mesma, sorrayó la importancia d'una decisión rápida per parte del Ministeriu d'Industria. “Convien que'l Ministeriu d'Industria resuelva esto y nun vale esperar a payares, tien que ser yá”, incidió'l diputáu autonómicu, en demanda de “un cuadru normativu que dexe la supervivencia de la empresa y de el trabayadores” nun momentu en qu'Asturies se ta xugando'l futuru de la minería y de la industria.
Los representantes sindicales d´Alcoa axuntaron con tolos grupos parlamentarios con representación na Xunta Xeneral pa sollertar del posible cierre si se caltién el costu de la tarifa eléctrica. Alcoa tien alredor de 400 trabayadores en plantiya y xenera otros 600 indirectos.
