Menu

IX-BA-Verdes presentó esta mañana n'Uviéu'l programa eleutoral col que van concurrir a los próximos comicios eleutorales y realizó un balance de la xestión de llexislatura.

IX-BA-Verdes presentó esta mañana n'Uviéu'l programa eleutoral col que van concurrir a los próximos comicios eleutorales y realizó un balance de la xestión de llexislatura. Jesús Iglesias, canditadu d'IX-BA-Verdes a la presidencia del gobiernu asturianu, compareció énte los medios xunto a Laura González, Conseyera de Vivienda y Bientar Social, Francisco Javier García Valledor, Conseyeru de Xusticia, Seguridá Pública y Asuntos Esteriores y Rafael Palacios y Joaquín Arce, representantes del Bloque por Asturies y Los Verdes, respeutivamente.

Jesús Iglesias, candidatu a la presidencia del gobiernu asturianu esplicó dalgunes de les midíes de gobiernu que van llevar a cabu la coalición. Les midiíes más llamatives presentaes por Iglesias nel actu, amás de les yá conocíes, afeuten al trabayu mozu, al sofitu de los trabayadores autónomos y a la sociedá de la información.

IX-BA-Verdes va poner en marcha un Plan de Trabayu Mozu, que va duplicar el presupuestu actual dedicáu a esta medida. Los sos destinatarios van ser los mozos ensin formación, con formación profesional o universitaria. IX-BA-Verdes va afalar los contratos de dos años na alministración asturiana y el so sector públicu, va abrir una llínia específica de sovención a los Ayuntamientos que desenrrollen esti Plan de Trabayu Mozu nes mesmes condiciones y entamará un programa específicu pa les lleendes urbanes". Jesús Iglesias recordó qu'IX "apuesta por que los mozos que tuvieron que marchar d'Asturies tengan la posibilidá de tornar, como emprendedores o sofitando a les empreses que-yos faigan ufiertes de trabayu".

Jesús Iglesias tamién adelantó qu'IX-BA-Verdes va estender les ayudes económiques pa impulsar los contratos relevu pa los autónomos en casu de baxa por enfermedá o accidente llaboral. Va crear la Fundación del
Autónomu col oxetivu de qu'esti numerosu coleutivu, qu'a vegaes vese obligá a selo por imposición empresarial, tenga representación xunto cola alministración y los sindicatos nes decisiones que-yos afeuten.

Del mesmu mou, IX-BA-Verdes va potenciar la Sociedá de la Información y les Nueves Teunoloxíes, creando un Organismu Públicu d'Innovación Teunolóxica y facilitando una alministración abierta, lletrónica y participativa.
Francisco Javier García Valledor, Conseyeru de Xusticia, Seguridá Pública y Asuntos Esteriores, aseguró que la participación per primer vegada de la coalición nel gobiernu asturianu supunxo una mayor estabilidá, defendió meyor los intereses d'Asturies énte Madrid, amás de tener introducío más polítiques de la izquierda en trabayu, vivienda, atención a persones mayores, sanidá, educación y más desenrrollu del autogobiernu d'Asturies.

Tamién, a xuiciu de Francisco Javier García Valledor, la presencia d'IX-BA evitó dalgunes actuaciones lesivas pa la nuesa comunidá autónoma como: el fornu incinerador de Cogersa, la presa del Caliao o la correición del proyeutu 3C pa la ampliación d'El Musel. "La nuesa presencia permitió que s'aprobaren numeroses lleis demandaes pola sociedá asturiana", dixo Valledor en referencia a que con namás dos conseyeríes IX-BA llogró que'l 50% de la llexislación aprobada pol
Parlamentu perteneciere a estos dos departamentos.

"Dende l'entamu la llexislatura foi yá campaña eleutoral pa nós", aseguró la Conseyera de Vivienda y Bientar Social, Laura González. González considera que la meyor campaña son los fechos: la meyora de los servicios sociales, la creación de places residenciales, centros de dia... "Nós tenemos muncho respetu pola xente y nun vamos a
prometer nada que nun vaigamos a cumplir.

Esa ye una seña d'identidá d'Izquierda Xunida", dixo Laura González a los medios de comunicación, al igual que la cooperación al desenrrollu -que llega nestos momentos al 0,7% del presupuestu, la defensa de la costa asturiana énte la especulación inmobiliaria y la creación de viviendes protexíes y l'accesu a éstes como un drechu soxetivu.

DESCARGAR MIDÍES DE GOBIERNU