Menu

El diputáu nacional Rafa Cofiño que va llevar al Congresu'l retrasu nel esplegue esplegue total de la rede nesi conceyu, va solicitar tamién una xunta urxente col ministeriu competente na materia

L'alcalde, Adrián Gayo, denuncia'l retrasu en llograr la banda ancha para tol conceyu y esixe la so conclusión para garantizar la igualdá d'oportunidaes

El diputáu nacional de Sumar per Asturies, Rafa Cofiño, comprometióse güei en Teberga a esixir en Madrid la reactivación del esplegue de fibra óptica nel conceyu, hasta onde güei se movió para encetar, xuntu al alcalde, Adrián Gayo, la situación de la fallida implantación de la rede nesti territoriu. Polo pronto, el parllamentariu, anunció la realización d'una entruga al Gobiernu y el pidimientu d'una xunta urxente col ministeriu competente coles mires de conocer qué asocedió por que se suspendieren los trabayos y esixir la so continuación.

La visita fízose a pidimientu del alcalde, Adrián Gayo,  coles mires d'analizar una situación qu'afecta al accesu a les comunicaciones dixitales en parte del territoriu. Mientres l'alcuentru, Cofiño sorrayó que la paralización del esplegue de la rede de fibra xenera una esmolición relevante, yá que, aprofió, “supon dexar a una parte importante del territoriu de población ensin accesu a comunicaciones”. Esta situación, añedió, tien de resolvese para “nun dexar tras a zones rurales de la nuesa comunidá autónoma”.

El diputáu destacó que, magar ye necesariu atender les necesidaes de les zones urbanes, tamién “ye fundamental que zones como Teberga puedan tener este esplegue”. Nesti sentíu, anunció que “vamos solicitar una xunta urxente col ministeriu competente y vamos treslladar tamién una entruga al Gobiernu para ver cuál ye l'estáu de situación d'execución de les obres”.

Igualdá d'oportunidaes
Pela so parte, l'alcalde de Teberga, Adrián Gayo, estimó la visita del parllamentariu, según el so sofitu a la continuación del esplegue de fibra óptica nel so conceyu, un proyectu que, denunció, quedó deteníu "ensin nenguna esplicación”. El rexidor esplicó que, anque s'avanzó enforma y la cobertoria de fibra óptica llegó a gran parte de la población”, inda “queden munchos pueblos onde nun llegó”.

Gayo afirmó que, especialmente nun contestu de disponibilidad de fondos europeos, “nun podemos detener les meyores que yá se consiguieron” y defendió que l'accesu a la conectividad dixital ye “una tema d'igualdá d'oportunidaes al cual nun podemos arrenunciar”.