Menu

El coordinador xeneral de IU Asturies defende que la organización ye “fundamental” para l'espaciu políticu a la izquierda del PSOE y apela al federalismu

El coordinador xeneral de IU Asturies; Ovidio Zapico, reivindicó en Madrid, con motivu del 40 aniversariu d'Izquierda Xunida Federal, la trayectoria y el compromisu de la formación nes lluches pola conquista de derechos, pero tamién la vixencia del so proyectu nel contestu políticu actual.

Zapico aseguró que “40 años d'Izquierda Xunida, d'una fuerza político que si nun esistiera güei, haber qu'ensin dala dulda crear, porque ye la fuerza político que mientres estos 40 años nun arrenunció a nenguna llucha en nengún pueblu, en nengún barriu, en nenguna ciudá, yá non yá d'Asturies, que ye la comunidá de la que soi coordinador, sinón d'España”.

El dirixente sorrayó amás la relevancia institucional de la organización a lo llargo de la so hestoria: “fuimos perimportantes en munchos momentos d'estos 40 años, asumiendo responsabilidaes en gobiernos como'l d'Asturies, en gobiernos como'l d'España, en gobiernos tamién locales”.

En relación cola situación política actual, señaló que “tenemos una xera per delantre bien importante n'una situación d'emerxencia democrática que ye na que tamos agora mesmu viviendo” y añedió que “tenemos que dar una respuesta a esta situación de reconstrucción del Estáu democrático y social de derechu que Vox y el Partíu Popular pretenden”.

Coles mesmes, criticó'l papel de la socialdemocracia: “con una socialdemocracia amás qu'en bien de ocasiones d'estos 40 años nun quixo o nun supo caminar con nós y con nós, y que dexó tamién falles estructurales importantes nel sistema”.

A lo último, defendió la vixencia del proyectu políticu d'IX: “Poro, 40 años dempués, Izquierda Xunida nun sigue solamente vixente, ye fundamental para vertebrar la reconfiguración del nuesu espaciu políticu, del espaciu políticu qu'esiste nesti país a la izquierda del Partíu Socialista, y que lo hai que faer dende los valores, y toi seguro d'ello, del federalismu y de la federalidad”.