Menu

Xabel Vegas destaca'l papel heroicu” de la Brigada de Salvamentu Mineru y esixe a HUNOSA resolver el conflictu sobro les hores extra

El voceru parlamentariu de Convocatoria por Asturies, Xabel Vegas, pidió güei que s'intensifiquen les investigaciones sobro l'accidente asocedíu en TyC Narcea, según un refuerzu de les inspecciones en toles esplotaciones mineres pa evitar nueves traxedies.El diputáu realizaba estes declaraciones tres la xunta caltenida col conseyeru de Ciencia, Industria y Empléu, Borja Sánchez, precisamente pa encetar los trabayos que se desenvuelven pa esclariar l'accidente nel que perdieron la vida dos persones.

Vegas quixo reconocer l'exerciciu de "tresparencia" de Borja Sánchez, que, al so xuiciu, ye "descomanadamente necesariu pa dar tranquilidá tanto a los grupos parlamentarios como sobremanera a la ciudadanía y a la comunidá minera asturiana.”

El voceru de Convocatoria por Asturies detalló que los datos provisionales apunten a un sucesu inseperado, pero aportunó na necesidá d'afondar na investigación y reforzar la vixilancia: “los datos preliminares de los que disponemos indiquen que se trata d'un sucesu casual, que nada tien que ver colo asocedío na mina de Zarréu, pero sía que non vamos pidir, y asina lo ta faciendo la Conseyería, que s'intensifiquen les inspecciones y l'investigación pa saber qué ye lo qu'asocedió y evitar que vuelva asoceder.”

Xabel Vegues aprofió qu'el so grupu yá solicitara la paralización cautelar de les instalaciones mineres con proyectos d'investigación complementarios tres l'accidente na mina de Degaña, ente elles la de TyC Narcea, magar, reconoció que la situación nun ye comparable, anque, igualmente, ye imprescindible investigar qué asocedió esactamente, pa, añedió, "poner tou per parte de l'Alministración por que nun vuelva asoceder y nun tener esi datu qu'enllena de rabia a tolos asturianos que ye un añu con siete muertos na redolada de la minería del carbón n'Asturies cuando yá ye xuna industria casi residual."

El diputáu quixo tamién reconocer el llabor de la Brigada de Salvamentu Mineru, calificándola d'imprescindible y exemplar: "hai que poner en valor el trabayu de la Brigada de Salvamentu Mineru que tanto nesti accidente como nel de Zarréu dio lo meyor de sigo mesma nuna actitú heroica y que ye imprescindible pa garantizar la seguridá nes mines; hai qu'esixir a la empresa HUNOSA que resuelva esi conflictu, qu'abone les hores extra que-yos debe a esi trabayadores que son un exemplu de coraxe, un exemplu de valentía y un exemplu de lluchar pola seguridá dientro de les mines.”