Menu

El coordinador xeneral d'IX considera inesistente l'autocrítica del PSOE y alerta de la meyora de la estrema derecha pola falta de respuestes a la clase trabayadora

El coordinador xeneral de IX Asturies, Ovidio Zapico, valoró esti martes a entrugues de los medios de comunicación les consecuencies polítiques de les elecciones n'Estremadura y la reacción posterior del Partíu Socialista, respecto a si esperara una mayor autocrítica per parte d'esta formación. Pa Zapico, "nun hubo un ápice d'autocrítica", frente a lo que defendió la necesidá de que la esquierda cavilgue sobro qué ta asocediendo na ciudadanía: "¿qué tamos faciendo cuando xuna parte importante de la clase trabayadora, xuna parte importante de la xente más humilde y de los colectivos vulnerables ta col enfotu de la estrema derecha? Eso ye daqué tarrecible, yo creo. Tamos poniendo en riesgu, díxelo va un minutu, l'Estáu Democrático y Social de Derechu, porque nun tamos sabiendo dar respuesta a necesidaes materiales de la clase trabayadora. Esa ye la reflexón que tien que faese na esquierda. Ye lo que tien que pensar la esquierda y, en concretu, sobremanera agora n'Estremadura, el Partíu Socialista, qué ye lo que pasó."

El dirixente d'IX señaló que, al so xuiciu, la resultancia electoral n'Estremadura dexa estrayer delles conclusiones polítiques relevantes. De primeres, señaló, "ye un escalabru total y absoluto del Partíu Socialista. De segundes, ye una irresponsabilidá per parte del Partíu Popular, que nun llogró pa nada el so oxetivu y lo que fixo ye eponderar entá ye más a esa estrema derecha. Y tamién, bonu, yo creo qu'hai un mensaxe pa la esperanza, nel sentíu de qu'hai una esquierda, a la izquierda del Partíu Socialista, que cuando trabaya bien y cuando trabaya xunida, llogra bones resultancies".

Esti contestu político y social obliga a encetar estos cambeos y enclinos si quier ufiertase respuestes que satisfaigan a la mayoría social: "toes eses reflexones tiénennos que llevar a una conclusión, y ye que precisamos solmenar esta desorientación qu'agora mesmu tien la esquierda, que nos tenemos que solmenar d'esi estáu d'afandu qu'agora reina nuna bona parte de la esquierda; tenemos que pasar a la ofensiva d'una manera constructiva, pero sobremanera contundente. Y que tenemos que, con midíes como la de güei, d'esti Real Decretu (en referencia al alcordáu pol Gobiernu de la nación pa blindar les polítiques sociales), dicir a esos colectivos ciudadanos, a esa clase trabayadora, que somos el gobiernu que los representa, que los defende y el modelu que va velar polos sos derechos", esplicó Zapico, mientres una visita a Morcín pa encetar un nuevu proyectu de rehabilitación de viviendes empobinaes a arriendu algamadizu nesi conceyu.

Finalmente, el coordinador xeneral de IX sorrayó la importancia de que la esquierda caltenga'l so compromisu colos sectores sociales más vulnerables, alvirtiendo de les consecuencies de nun faelo: "Si la esquierda nun s'esmolez pola so xente, si la esquierda nun s'esmolez polos colectivu sociales más desfavorecidos y nun s'esmolez pola clase trabayadora, nun engañemos, la derecha y l'estrema derecha nun lo van faer"