Menu

Izquierda Xunida d'Asturies y el sindicatu agrariu amosaron güei el so refugu al tratáu de llibre comerciu UE-MERCOSUR

Ovidio Zapico: “Nun sirve manifestase contra MERCOSUR n'Asturies mientres se vota a favor en Bruxeles”

David Pérez (COAG): “Esti alcuerdu puede ser el puntu final de lo que conocemos como campu asturiano”

Izquierda Xunida d'Asturies y el sindicatu agrariu COAG amosaron güei el so refugu fronteru" al tratáu de llibre comerciu ente la Unión Europea y MERCOSUR, un alcuerdu que, según dambes organizaciones, pon en grave riesgu'l futuru del campu asturiano, la soberanía alimentaria y el modelu de ganadería estensiva y sostenible. Asina lo manifestaron esta mañana nuna rueda de prensa conxunta'l coordinador xeneral de IX Asturies, Ovidio Zapico, y el secretariu xeneral de COAG, David Pérez, en calteniendo un alcuentru de trabayu nel que constataron la plena coincidencia de les sos posiciones frente a un tratáu pensáu pa les multinacionales y non pa los pequenos llabradores y ganaderos”. Dambos dirixentes llamaron amás a la máxima participación na movilización convocada pola central agroganadera pa mañana n'Uviéu llamáu a refugar esi pactu.
Zapico alvirtió de que MERCOSUR “va introducir nos nuesos mercaos alimentos de baxa calidá, producíos ensin les esixencies ambientales y sanitaries que s'imponen al campu asturiano”, lo que va suponer una competencia deslleal qu'amenacia directamente la viabilidá de les esplotaciones locales. “Dempués d'años esixendo a los nuesos ganaderos sostenibilidá, respetu ambiental y llucha contra'l cambéu climáticu, pretende abrísenos agora a un tratáu con una buelga de carbonu incalculable y que nos alloñar de la soberanía alimentaria”, señaló.

El coordinador xeneral de IX sorrayó amás el componente social del alcuerdu: “Tán emponiéndonos a un modelu nel que solo quien tengan más recursos van poder aportar a alimentos calidable, mientres la mayoría va vese obligada a consumir productos importaos de peor calidá. Esto ye una cuestión de clase”.

Nesti contestu, Zapico cargó con durez contra l'actitú de les fuerces polítiques que mañana van participar na movilización convocada n'Uviéu contra MERCOSUR. “Nun sirve dir manifestase al pie de los ganaderos mientres, coles mesmes, déxase esti tratáu colos votos nel Parlamentu Européu”, afirmó, señalando directamente al PP y al PSOE: “los sos eurodiputaos, incluyíos los asturianos, van tener la oportunidá de demostrar si'l so refugu ye real: ye tan senciellu como votar non”.

Frente a esta hipocresía política, Zapico remarcó qu'Izquierda Xunida yá anunció que los sos eurodiputaos van votar en contra del tratáu nel Parlamentu Européu, y que los sos diputaos y diputaes nel Congresu, integraos nel grupu de SUMAR, tamién lo refugarán. “MERCOSUR ye'l mayor envite al que s'enfrenta güei el campu asturiano. Llámase MERCOSUR y hai que paralo”, sentenció.

Pela so parte, el secretariu xeneral de COAG, David Pérez, sofitó les palabres de Zapico y fixo un llamamientu a la coherencia política y al sofitu real al sector primariu. “Vamos tar al llau de quien quiera trabayar de verdá pel campu asturianu, non de quien solo vien faese semeyes”, afirmó.

Pérez sollertó de que l'alcuerdu puede suponer “el puntu final de lo que conocemos como campu asturiano”, y recordó que mientres años s'esixó a llabradores y ganaderos cumplir estrictes normes ambientales y asumir altos costos de producción, para agora dexar la entrada de productos que nun cumplen esos requisitos y a precios colos que ye imposible competir. “Esto non solo afecta a llabradores y ganaderos: comer comemos toos, y tenemos derechu a alimentos calidable”, sorrayó.

El dirixente de COAG alvirtió de los graves riesgos que'l tratáu de MERCOSUR implica para producciones emblemátiques d'Asturies como'l miel o les fabes, sollertando de qu'alcuerdos como esti pueden acelerar la perda d'identidá y viabilidá del modelu agroganadero rexonal. Nun tonu críticu ya irónicu, esplicó que, a pesar de qu'Asturies tien un potencial agroganadero estraordinariu, esti tipu d'alcuerdos pon en riesgo producto locales, dalgunos yá con unes colleches insuficientes, como la faba asturiana, con apenes 70 tonelaes producíes l'añu pasáu, Esti tratáu, señaló, va ser una amenaza cola entrada, por casu de llegumes importaes. "¿De qué sirve tener la meyor tierra si a la fin nun podemos producir nin protexer lo nueso?”, plantegó, esplicando qu'en cuenta de falar de fabada asturiana" quiciabes haya que terminar falando de la fabada bolivian!, cuidao que MERCOSUR abre la puerta a la competencia deslleal poniendo en peligru non solo la producción local, sinón tamién el texíu rural y la soberanía alimentaria de la comunidá.

Tantu IX como COAG confirmaron la so participación na movilización de mañana n'Uviéu y fixeron un llamamientu a la ciudadanía para defender el campu asturiano frente a un tratáu que, aseguren, “solo beneficia a les grandes corporaciones y pon en riesgo año de trabayu, esfuerzu y conquistes del sector agrariu”.