Menu

El coordinador xeneral de IX considera que la propuesta de Pedro Sánchez contradiz la Llei de Vivienda y supon “regalar beneficios fiscales a los propietarios en cuenta de prácticamente nada”

El coordinador xeneral de Izquierda Xunida de Asturies (IX), Ovidio Zapico, amosó'l so refugu a la propuesta anunciada pol presidente del Gobiernu, Pedro Sánchez, d'establecer deducciones fiscales a los propietarios que conxelen el preciu del arriendu, al considerar que contradiz l'espíritu y el conteníu de la Llei de Vivienda y nun encara de manera efectiva'l problema del accesu a la vivienda. “Nun entiendo cómo, amás de manera unillateral, puede decidise esos beneficios fiscales a aquellos propietarios que se llinden a conxelar el preciu del arriendu, cuando la Llei de Vivienda establez qu'en zones tensionadas van tener bonificaciones fiscales a aquellos propietarios que pongan el so preciu nel mercáu per debaxo de la renta media del mesmu”, señaló Zapico.

Nesti sentíu, el dirixente d'IX y conseyeru d'Ordenación del Territoriu, Urbanismu, Vivienda y Derechos Ciudadanos, sorrayó que los incentivos fiscales namá tendríen sentíu si empobinasen a amenorgar los precios: “Sí entendería qu'hubiera beneficios fiscales a aquellos propietarios que punxeren el so pisu nel mercáu per debaxo del valor mediu de la renta del mesmu, non na conxelación”.

Zapico reclamó una intervención decidida per parte del Gobiernu d'España, tantu a curtiu como al mediu plazu, pa frenar la esguilada de los arriendos. “El Gobiernu d'España tien qu'actuar de manera urxente, estraordinaria y provisional, afitando los precios de los arriendos, qu'estos nun xuban más, per un sitiu”, afirmó. Y añedió que, como solución estructural, “nel Congresu de los Diputaos y Diputaes, tien que presentase per parte del Gobiernu un proyectu de llei que dexe afitar el preciu máximu d'estos arriendos”.

Regalar beneficios fiscales a rentistas

Al so xuiciu, la propuesta plantegada dende la nala socialista del Executivu escarez d'eficacia real: “Lo que plantega la parte socialista del Gobiernu d'España, al traviés del propiu presidente, yo creo que ye regalar beneficios fiscales a los propietarios en cuenta de prácticamente nada. Y ensin cumplir siquier los marxes que la mesma Llei de Vivienda nacional establez”.

Preguntáu pola posición de la Federación Socialista Asturiana (FSA), Zapico señaló que “yo entiendo que la FSA va tener que siguir la posición que plantega'l Partíu Socialista a nivel nacional”, anque foi tayante na so valoración política: “Equivócase Pedro Sánchez, esto ye, el Partíu Socialista Obreru Español, equivócase, poro, la Federación Socialista Asturiana”.