Menu

El rexidor almite a entrugues de Xabel Vegas que nun impunxo midíes cautelares magar la falta de permisos y tases, mientres la concejala d'IX Sofía Barredo asegura que "tol mundu sabía" que s'estrayía carbón

El voceru d'IX Convocatoria por Asturies na Xunta Xeneral, Xabel Vegas, llogró güei que l'alcalde de Degaña, Óscar Ancares reconociera que la mina de Zarréu funcionó mientres trés años ensin llicencia municipal d'actividá nin el pagu de tases, magar que'l Conceyu yera consciente de que nun se presentó la documentación necesaria para autorizala. Ello ye que la única acción municipal foi riquir una documentación pola qu'esperó, según l'alcalde, "un tiempu prudencial", qu'en realidá fueron dellos años.

La comparecencia del rexidor énte la comisión parlamentaria qu'investiga l'accidente que'l pasáu 31 de marzu costó la vida a cinco mineros tuvo marcada pola tensión y poles repitíes entrugues de Vegas, qu'acabaron dando resultancia. L'alcalde almitió que nin Combayl nin darréu Blue Solving cuntaron nunca con llicencia municipal nin con Declaración Responsable, y que la única actuación del Conceyu foi un requerimientu de documentación en 2022, tres el cual la esplotación siguió funcionando hasta l'accidente de 2025 ensin que s'adoptara nenguna midida cautelar pa torgar los trabayos.

Ancares xustificó la inacción municipal alegando qu'actuaba conforme a los criterios técnicos y que nun podía cobrar tases mientres nun esistiera llicencia, afirmando: “Yo nun voi expedir una llicencia si nun tengo tola documentación na mio poder. Blue Solving tenía lo que tenía dexáu dende la Conseyería d'Industria pa faer el proyectu de desimpactación, pero non llicencia municipal”.

Ante les entrugues insistentes d'IX sobre por qué nun s'actuó ente 2022 y 2025, l'alcalde escudose nos informes técnicos y na actuación de la Intervención municipal: “Yo soi l'alcalde y por tantu'l máximu responsable, pero tengo xente percima de mi que me diz les normes xurídiques que tengo qu'activar”.

El rexidor negó conocer que se tuviera sacando carbón y aseguró habese enteráu pola prensa tres l'accidente mortal, anque reconoció habese aconceyáu “dos o trés vegaes” col empresariu Jesús Rodríguez Morán, ‘Chus Mirantes’, y compartir “dalguna comida”. Finalmente, almitió que la empresa realizó una "aportación" económica pa un concursu navidiegu.

Dende IX Convocatoria por Asturies, Xabel Vegas reprochó mientres comisión la contradicción ente dexar l'actividá mientres años ensin llicencia nin tases y nun adoptar nenguna midida pa paralizar la esplotación, dexando n'evidencia la responsabilidá política del Conceyu nuna situación alministrativa irregular, y conocida pol Alcalde, enllargada nel tiempu.

Nes sos entrugues, el diputáu tamién pidió al Alcalde qu'esclariara delles informaciones periodístiques nes que s'aseguraba recibir apurríes de la empresa qu'esplotaba la mina de Zarréu, daqué que negó, magar reconoció que sí que pidiera una "aportación" pa unes fiestes navidiegues.

Pela so parte, la concejala d'IX en Degaña, Sofía Barrero, contradixo la versión del alcalde no tocante a l'actividá minera al asegurar que la estracción de carbón yera un fechu conocíu nel conceyu: “nel pueblu, polos chigres, en tolos sitios” falábase d'ello". Y ye que l'actividá minera yá se conocía dende l'accidente d'agostu de 2022, magar esclarió qu'esa conocencia xeneral nun significaba que la xente pudiera saber que se trataba d'una actividá illegal.

La conceyala foi bien crítica cola xestión del alcalde y cola falta de tresparencia escontra la oposición municipal, señalando qu'IX nun supo que la mina escarecía de llicencia hasta meses dempués del accidente mortal, daqué qu'inscribió na opacidá xeneral na que funciona'l Gobiernu de Oscar Ancares.