Menu

IX reclama que la política de vivienda respuenda a los intereses de la xente y non a los de promotores y constructores. Denuncia que nel últimu añu'l Gobiernu nun llicitó nin una sola vivienda social. Espera que los presupuestos del 2009 contemplen más dineru pa construyir vivienda protexida, ayudes a la compra, alquiler y rehabilitación, y nueves sovenciones pa pagar les hipoteques.

UVIÉU, 20/08/2008.- L'accesu a una vivienda digna ye un drechu que munches persones nun puen permitise. Los elevaos precios de la vivienda llibre, xunto cola precariedá y los baxos salarios, caractericen la realidá d'una parte importante de la nuestra sociedá, especialmente los xóvenes.

A esti panorama añádese les continues xubes del Euribor, que provocó un importante incrementu del preciu de les hipoteques, allugando na quiebra técnica a la economía de miles de families.

Na anterior llexislatura, Asturies caracterizóse por desenrrollar unes polítiques públiques que favorecieron l'accesu de munchos asturianos a una vivienda. Por embargu, nel últimu añu'l Gobiernu d'Areces asitió esa política de vivienda na ñevera. Nun llicitaron nin una sola vivienda social y tán incumpliendo los alcuerdos que'l propiu Gobiernu firmó colos axentes sociales na concertación. La única decisión que tomaron en materia de vivienda no que llevamos de llexislatura foi incrementar el preciu de la vivienda protexida, ye dicir, enllenar los bolsos de los constructores y promotores con dineru públicu. Agora tol mundiu pue comprender por qué altos directivos de la CAC mostraron en públicu'l so entusiasmu cuando los socialistes volvieron a tar al frente de la Conseyería de Vivienda.

El Gobiernu tien que tomar decisiones. Nun pue quedar colos brazos cruciaos mientres l'accesu a una vivienda ye unu de los principales problemes pa los asturianos. IX recuerda que la propia FSA, al traviés del so secretariu d'organización, comprometióse públicamente al iniciu d'esta llexislatura a poner en marcha nueves ayudes pa facilitar el pagu de les hipoteques a les families con menos recursos, tal y cómo reclamaba IX. No que llevamos de llexislatura'l Gobiernu socialista nun fizo nada. Paez que tienen dalgún problema d'amnesia selectiva.

Pa IX ye necesario que'l Gobiernu asturianu dea un golpe de timón nes sos polítiques de vivienda: deben dexar de tar al serviciu de los intereses de los constructores y promotores pa volver a tar subordinadas al interés xeneral, el de la mayoría de ciudadanos. Y pa ello ye necesario volver a llicitar vivienda d'iniciativa pública, volver a impulsar la promoción de vivienda protexida, incrementar los recursos dirixíos a sovencionar la compra, alquiler o rehabilitación de vivienda, poner en marcha una nueva llínia d'ayudes pa facilitar el pagu de les hipoteques a les families con menos recursos.

Les cuatro midíes propuestes por IX deberíen tar contemplaes nel próximu presupuestu d'Asturies, ye imprescindible garantizar recursos pa resolver los problemes reales de los asturianos y asturianes.