Menu

El diputáu d'IX-BA-Verdes, Francisco Javier García Valledor esixe al gobiernu asturianu a tomar la iniciativa de forma seria y rigurosa énte la Xunta de Galicia y reclamar, per escrito, la paralización del muelle flotante en Ribadeo. El diputáu amuésase escépticu, una vegada más, énte les pallabres de la vocera del gobiernu asturianu.

El diputáu d'IX-BA-Verdes, Francisco Javier García Valledor esixe al gobiernu asturianu a tomar la iniciativa de forma seria y rigurosa énte la Xunta de Galicia y reclamar, per escrito, la paralización del muelle flotante en Ribadeo. El diputáu amuésase escépticu, una vegada más, énte les pallabres de la vocera del gobiernu asturianu. Ana Rosa Migoya diz agora que van volver a mandá-y una nueva carta al executivu gallegu, cuando yá pasó más d'un mes ensin que la primera obteniere rempuesta. Francisco Javier García Valledor confía en que ésta "palomba mensaxera" llegue agora al so destín correctu y nun quede, como l'anterior firmada por Belén Fernández, nel "llimbu de los xustos".

Del mesmu mou, confía en que dambos gobiernos formen de secute la comisión temporal de coordinación institucional pa xestionar la Ría del Eo, y qu'ésti organismu nun seya una escusa pa prolongar "sine die" un problema al qu'hai que dar solución nun curtiu plazu de tiempu. Amás, esa comisión yá tendría de ser creada "inmediatamente" dempués de la cume gallego-asturiana cola participación de conceyos y comunidaes, recuerda Valledor.

Esto entró nel Conseyu de Gobiernu'l día 7 de mayu y tea dau por enteráu.Valledor tamién amuesa la so esmolición poles declaraciones feches pola Conseyera de Política Territorial de la Xunta de Galicia, María José Caride, (daes a conocer güei por Europapress) nes qu'asegura que l'únicu efectu del muelle flotante de Ribadeo va ser estéticu y, tal como fizo la Conseyera de Mediu Ambiente asturianu la selmana pasada, confía na oposición del conceyu de Ribadeo pa nun llevala alantre. El diputáu asturianu convida a les dos conseyeríes, la de Política Territorial gallega y la de Mediu Ambiente asturiana, a facese cargu de les sos responsabilidaes y nun delegar nun conceyu.

Pa Valledor les declaraciones de la Conseyera gallega llamen l'atención tamién porque únicamente se refieren a la posición del conceyu de Ribadeo, nenguneando al gobiernu asturianu yá que nun se fai referencia dala a la coordinación institucional pa xestionar la Ría del Eo, acordada por dambos gobiernos.