Menu

García Valledor esixe al gobiernu asturianu que presente alegaciones escontra la terminal flotante de Ribadeo y nun delegue les sos responsabilidaes

La Consyera de Mediu Ambiente del gobiernu asturianu, Belén Fernández, volvió a facer el más absolutu de los ridículos al afirmar que poles conversaciones telefóniques manteníes col so "homólogu gallegu" el muelle flotante de Ribadeo nun saldría alantre, asegura Francisco Javier García Valledor, diputáu d'IX-BA-Verdes na Xunta Xeneral, quien foi'l primeru en duldar de les pallabres de Fernández tres la so comparecencia nel parllamentu asturianu, el xueves pasáu.

Francisco Javier García Valledor yá alvirtió de que la Conseyera de Mediu Ambiente taba faciendo dexación de funciones y delegando nun ayuntamientu de la comunidá gallega la defensa de los valores medioambientales de la Ría del Eo. Les pallabres del presidente de Portos de Galicia que güei reflexen la prensa asturiana asina lo corroboran. El diputáu d'IX-BA-Verdes considera que Belén Fernández ta tratando de quitase d'enrriba la so responsabilidá, aludiendo a un compromisu que nunca nun esistió, ye más, enquivocóse hasta de conseyería competente al dirixise al gobiernu gallegu.

Esta actitú nun ye nueva per parte de la Conseyera "escontra'l mediu ambiente" que yá actuó de la mesma forma atribuyendo a los ayuntamientos la potestá de decidir si se constrúi la macroincineradora o non.

El diputáu d'IX-BA-Verdes esixe que'l gobiernu asturianu demande, de forma inmediata, al gobiernu gallegu compromisos concretos con una validez contrastada pa que'l muelle flotante nun se lleve alantre, non les llamaes de la Conseyera de Mediu Ambiente -al departamentu enquivocáu- que más paecen les de Gila preguntando "¡óiga!, ¿ye ehí l'enemigu? -salvando les distancies, claro ta-. 

IX-BA-Verdes reclama que, de manera inmediata, el gobiernu d'Asturies presente alegaciones escontra esta instalación que defiende Portos de Galicia, escontra la que non sólo se manifestó l'Ayuntamientu de Ribadeo, sinón los alcaldes del occidente asturianu ya incluso l'agrupación llocal del Partíu Socialista de Ribadeo.

García Valledor pide al gobiernu asturianu qu'exerza la so responsabilidá y recuerda que, hasta'l momentu, nun dio muestres d'ello yá que, como reconoció la Conseyera de Mediu Ambiente na Xunta Xeneral del Principáu, nes conclusiones de la "Cume" de les dos comunidaes celebrada los díes 18 y 19 d'abril en Santiago de Compostela, nun se recoyió nengún asuntu rellacionáu coles infraestructures, el medioambiente y les comunicaciones.