Menu

PSOE y PP voten en contra de faer un siguimientu y control de detención de la población inmigrante y la so posterior deportación, velando sía que non pol cumplimientu de los derechos humanos

Marta Pulgar demandó, ensin ésitu, esta mañana'l sofitu del restu de grupos parlamentarios a les denuncies de les ONG's asturianes, recoyíes pola parllamentaria, nes que ciscaben el refugu y cese de detenciones selectives de persones inmigrantes col únicu fin d'enllenar los vuelos programaos pol Ministeriu del Interior pa la deportación de los mesmos. Esti primer puntu de la moción subsiguiente a interpelación namái foi sofitáu por UPYD,  ente que'l restu de los grupos argumentaron qu'estos supuestos fechos, en casu de comprobase, transcienden la competencia del parlamentu y tendríen de denunciase nos xulgaos.

La parllamentaria d'IX demandaba tamién faer un siguimientu y control de la detención de la población inmigrante y la so posterior deportación, velando sía que non pol cumplimientu de los derechos. Al so xuiciu, nestos momentos, tán produciéndose detenciones de persones cuando van realizar trámites nes oficines d'extranxería o cuando van pidir ayudes nes oficines de les ONG,s, “ensin tener en cuenta l'enraigonu social de toes estes persones” . Esti segundu puntu tamién foi refugáu polos votos de PSOE y PP, 27 diputaos, frente a los 18 d'IX, UPYD y Foro Asturies. L'únicu puntu que cuntó cola unanimidá foi una declaración a caltener y consolidar les polítiques que garanticen la integración de les persones inmigrantes n'Asturies.

Na so intervención Pulgar tamién alvirtió “que ser probe nesta sociedá paez un delitu”, y que la condición de ciudadanos nun lu da un papel”. Según los datos ufiertaos pol Gobiernu asturianu, mientres l'añu 2013 fueron espulsaos y repatriaos de la rexón 138 persones, de les que 117 taben condergaos por fechos delictivos, “munchos d'ellos por vienta ambulante o por ser manteros, por intentar sobrevivir, superar la fame, la probeza o fuxir de les guerres”, denunció la diputada d'IX. Pulgar convidó al restu de parllamentarios a encarar la inmigración como una realidá y como un derechu” y a ver tres ella “la reivindicación d'un mundu más xustu ya igualitariu”.

De la mesma, tamién alvirtió de la necesidá de dar una respuesta clara y en defensa de los derechos humanos frente a la puxanza de la derecha xenófoga en toa Europa.