Menu

Va Llevar a la cámara una Proposición Non de Llei sobre'l pagu de la teleasistencia y ayuda a casa

El grupu parlamentariu d'IX na Xunta Xeneral va apellar esti xueves a la Conseyera d'Educación y Cultura sobre qué posición va tener Asturies al respective de l'aplicación de la reforma de la Formación Profesional que plantega'l Ministru Wert. Ángel González, el voceru d'IX, esplicó que l'oxetivu de la interpelación ye saber si Asturies “va sumase o non a la carrera urxente de desguazar tol sistema” como, al so xuiciu, plantega la llei popular, y cuál va ser l'actuación autonómica.

Amás d'esta interpelación, IX rexistró una Proposición Non de Llei xunto UPYD y Foro Asturies que se va aldericar na sesión del vienres. Ésta tien como oxetivu que la Conseyería de Bienestar Social y Vivienda dea en la revocación d'oficiu de los resolvimientos polos que s'empecipia'l procedimientu de revisión de la prestación de los servicios de teleasistencia y d'ayuda a casa de les persones dependientes, pola que s'establez el réxime de participación económica nel costu d'estos dos servicios. El testu inclúi un segundu puntu nel que se demanda unos nuevos resolvimientos nes que s'alcuerde que los efectos de la revisión en casu de ser desfavorable con al respective de les prestaciones o cuantíes de les que vienen esfrutando aplíquese-yos la más favorable. “Esperamos que la llei s'aplique en beneficiu de los usuarios y que, per un sitiu el PP vuelva a la cordura sofitando la propuesta inicial y que'l Gobiernu dea cuenta de que nun tien sentíu caltenese na tozudez”, aseguró'l voceru parlamentariu.

Fora del orde del día del plenu, y en respuesta a una información publicada güei, González amosó la so esmolición pol fechu de que'l Gobiernu d'Asturies nun tea recaldando l'impuestu a los bancos, como asocede col restu d'impuestos que paguen los ciudadanos. “Ye llamentable qu'un ciudadanu tenga que pagar en tiempu y forma y sinón faese cargu de los intereses de demoranza, apremios y embargos, y que los bancos “pretendan dise de rositas con nada menos que 30 millones d'euros”.

González alvirtió qu'una entidá asturiana sí pagó, mientres el restu non. “Esperamos que nun se vaigan de rositas”, alvirtió de la que preguntaba n'alto si ye esta la respuesta que tien el Gobiernu d'Asturies al bon tratu que recibe de les entidaes bancaries. González tamién se pregunta con qué suple'l Gobiernu autonómicu los 30 millones d'euros de gastu conseñaos nel presupuestu de 2013. “Espero que'l Gobiernu tome les midíes que correspuenden porque namái faltaba que se premie a los que se dediquen a boicotiar a la Facienda pública”, concluyó.