Menu

Jesús Iglesias, voceru parlamentariu d'IX-BA-Verdes na Xunta Xeneral del Principáu, espresó esta mañana la so indignación pola manera nel que'l gobiernu d'Asturies ta utilizando la prórroga presupuestaria con ánimu ellectoralista, una prórroga na qu'elli mesmo entró.

El gobiernu nun remitió a la Cámara nin un solu datu presupuestariu pese a les reclamaciones feches por rexistru

Jesús Iglesias, voceru parlamentariu d'IX-BA-Verdes na Xunta Xeneral del Principáu, espresó esta mañana la so indignación pola manera nel que'l gobiernu d'Asturies ta utilizando la prórroga presupuestaria con ánimu ellectoralista, una prórroga na qu'elli mesmo entró.

IX-BA-Verdes solicitó'l día 18 d'esti mes de febreru el detalle numbéricu de la prórroga presupuestaria pa conocer qué partíes presupuestaries foron prorrogaes y cuáles, según el criteriu del gobiernu d'Asturies, vayaron del presupuestu. “Nun recibimos esta información, y ensín embargu, si sabemos que distintos miembros del gobiernu tan treslladando a diferentes colectivos sociales y ayuntamientos treslladándo-yos que les sos reivindicaciones nun van podesa llevar al cabu pola prórroga”, aseguró Iglesias, quien calificó esti argumentu, en munchos casos de “falsu y falaz”. Nun tan renovándose convenios con entidaes y asociaciones que teníen calter añal -que taben renovándose dende haz bastantes años- y que, n'opinión d'IX-BA-Verdes, podríen ser perfeutamente renovaos. Ta comunicándose a estes asociaciones y entidaes que la responsabilidá política de que nun pueda soscribise esos convenios ta nes fuercies polítiques que nun sofitaron el proyectu de presupuestos, desplicó Iglesias ante los medios de comunicación na Xunta Xeneral.

El gobiernu punxo en marcha, en pallabres d'Iglesias, un aparatu d'“axitación y propaganda” al traviés de cartes, declaraciones públiques y en priváu que quier falsear la realidá y desgastar a IX-BA-Verdes.

El voceru parlamentariu d'IX resaltó que tovía nun se convocaron les ayudes a la cooperación con idénticu argumentu, comunicose que va paralizase'l centru de día y atención a la dependencia de Candás, cuya inversión tien calter pluriañal y, poro, pue afrontase ensín nenguna dificultá en situación de prórroga presupuestaria. Nun namái ta mintiéndose de forma deliberada, desplicó Jesús Iglesias, sinón que ta usándose de forma deliberada esta “nebulosa” -porque naide nun conoz el conteníu del presupuestu prorrogáu- pa facer dalgo que'l gobiernu quier facer pero cuyu coste político nun quiere afrontar: “ta utilizándose la prórroga presupuestaria p'amenorgar el pesu nos presupuestos del gastu social”.

Colos datos qu'IX-BA-Verdes “intuimos una prórroga presupuestaria fundamentalmente del hormigón que sacrifica'l gastu social pa satisfacer les demandes de sectores empresariales venceyaos a la obra pública”, dixo Iglesias. La contradición, según el voceru parlamentariu, ye que tan atopando requexos presupuestarios, al paecer, pa encaxar nuna situación de prórroga, coses muncho más difíciles d'encaxar como son los “regalos del gobiernu”.

Los regalos a los que se refirió'l voceru d'IX-BA-Verdes son el cheque bebé, los 500 euros más que da'l gobiernu d'Asturies al ñacimientu, que nun taben nel presupuestu del 2007, e “inventen” el sofitu xeneralizáu a l'adquisición de ordenadores. D'esta manera, a xuiciu d'Iglesias, el gobiernu d'Asturies améstase a la “tómbola ellectoral” del gobiernu socialista nel ámbitu del Estáu demostrando asina lo poco que se diferencien, na mayoría de les coses, los proyectos políticos del Partíu Popular y del Partí Socialista.

Na “tómbola ellectoral” el PP y el PSOE puen prometer les mesmes coses porque la base que sustenta esa propuesta ye una base compartía, como desplicó'l voceru na Xunta Xeneral. Son fórmules ellectorales con propuestes intercambiables, unes veces les formules el PSOE y otres el Partíu Popular y, a vegaes, hasta tan acusándose de copiase, ironizó Jesús Iglesias. “Lo últimu son los 400 euros de devolución del IRPF que ye una propuesta qu'acredita un proyectu políticu incoherente, que nun ye d'izquierdes como dixeron yá los sindicatos, UGT y CCOO, y que ye amás una idea improvisada y que califica una opción ensín sustancia”, según Iglesias.

IX-BA-Verdes nun va salir namái al pasu na prensa, sino qu'una vuelta que tenga los estaos numbéricos de la prórroga presupuestaria plantegará una batería de proposiciones non de llei para instar al gobiernu d'Asturies a satisfacer les necesidaes sociales nun contemplaes nesa prórroga presupuestaria y a satisfacer les demandes de los ayuntamientos que nun tengan encaxe na prórroga y sirvan pa executar proyectos pendientes y necesariu, afirmó Iglesias.