Menu

Laura González, candidata d'IX-BA-Verdes al Congreuo de los Diputaos, ufrió una rueda de prensa na que tuvo acompañada por Manuel G. Orviz, númberu 2 de la candidatura. La candidata fixo un balance de los sos primeros quince díes de precampaña: "ye un balance positivu porque tamos manteniendo reuniones con organizaciones sociales y ciudadanes, analizando les sos reivindicaciones y compartiendo les propuestes. Tamos recorriendo Asturies, escuchando a la xente na cai, conociendo de primer mano los sos problemes y les sos demandes. Y esti balance ye muncho más positivu si lu comparamos col trabayu que puen ufrir el PSOE ya'l PP".

Laura González, candidata d'IX-BA-Verdes al Congreuo de los Diputaos, ufrió una rueda de prensa na que tuvo acompañada por Manuel G. Orviz, númberu 2 de la candidatura. La candidata fixo un balance de los sos primeros quince díes de precampaña: "ye un balance positivu porque tamos manteniendo reuniones con organizaciones sociales y ciudadanes, analizando les sos reivindicaciones y compartiendo les propuestes. Tamos recorriendo Asturies, escuchando a la xente na cai, conociendo de primer mano los sos problemes y les sos demandes. Y esti balance ye muncho más positivu si lu comparamos col trabayu que puen ufrir el PSOE ya'l PP".

Laura González afirmó que "el Partíu Popular sorpréndenos cada día. Tan protagonizando una especie de "comedia bufa" na que un día aborden los sos problemes coles candidatures, al siguiente los problemes internos y les aspiraciones de poder, y recientemente conocemos los milagros de los callos de Benia. Lo qu'ignoramos ye si nel menú tamién hubo estallones. El PP asturianu recuérdame a una popular comedia de televisión, Escenes de Matrimoniu. El PP nun tiene munches posibilidaes de ganar les elleiciones. El 9 de marzu namái se va decidir cuánta izquierda hai nel Congresu".

La candidata d'Izquierda Xunida aprovechó pa valorar la última propuesta de baxada d'impuestos fecha por Rajoy. "Esti tipu de propuestes beneficien namái a los de siempre, los que más tienen. IX defiende una política fiscal progresiva, na que paguen más quienes más tienen. Xusto lo contrariu que'l PP. Tampoco compartimos lo que ta faciendo'l PSOE, qu'apuesta polos impuestos indireutos que pagamos todos por igual, al marxen de los nuesos ingresos. Ante les ufiertes de rebaxes d'impuestos hai que ser rigurosos. Y tar atentos si güei se rebaxa un impuestu y mañana se recorta un derechu, porque va haber menos dineru pa escueles infantiles de 0 a 3 años o pa subir les pensiones".

Laura González tamién se refirió a la precampaña del PSOE asturianu: "tan desapaecíos. Álvaro Cuesta ye'l gran ausente. ¿Ónde ta'l candidatu del PSOE? . El  vaciu ocúpalu Areces. Nun dexa de sorprender el papel que ta representado Areces. La reciente semeya repartiendo 20 ayudes ye un triste espectáculu pa la izquierda. Pretenden convertir derechos en concesiones. Como facía Fraga cuando yera presidente de la Xunta, que reunía a los ganaderos pa repartir les subvenciones. Que lo faiga la derecha ye normal, pero que persones d'izquierdes imítenlo tien poca xustificación".

Laura González denunció que "nestos momentos hai 500 viviendes protexíes ya axudicaes cuya entrega ta retrasándose pa dar les llaves en elleiciones. Esti mercadéu ye intolerable. Los socialistes tan faciendo coses que nun podríen si IX tuviera nel Gobiernu. Nun los díbamos dejar. Quinientes families nun puen acceder a la so vivienda protexía por intereses ellectorales. Ye aberrante"

Finalmente, Laura González afirmó que "ante esti triste panorama nosotros  vamos siguir faciendo una precampaña centrada no que realmente mos importa: los problemes de la xente. Y ye que hai que falar de lo que realmente mos esmolez: la precariedá nel emplegu, los salarios baxos, les torgues p'acceder a una vivienda, lo que cuesta llegar a fin de mes…"