Menu

El proyectu del PSOE y el PP nun atiende a la reactivación económica, la protección social, la meyora del sector agrariu o la garantía de los servicios públicos

Manuel González Orviz, Coordinador d'IX d'Asturies, y Aurelio Martín, voceru parlamentariu d'IX na Xunta Xeneral, presentaron esta mañana la enmienda a la totalidá con devolución al Gobiernu que va defender  el próximu vienres basada en que nun escenariu de crisis y fuerte cayida d'ingresos, les alministraciones públiques nun pueden dexase baxar los impuestos si lo que pretenden ye caltener el nivel mínimu de gastos pa sostener l'estáu del bienestar, onde les polítiques sociales, d'educación y sanidá xueguen un papel primordial.

Esti ye'l mesmu argumentu que señala l'Informe Económicu-Financieru qu'acompaña'l proyectu presupuestariu y que pa IX ye una contradicción con que'l mesmu presupuestu contenga una bien significativa rebaxa del tramu autonómicu del impuestu sobre la Renta de les Persones Físiques y una medría de les deducciones d'esi mesmu impuestu. “El presupuestu compromete un amenorgamientu de recursos nel añu 2017”, aseguró tamién el Coordinador d'IX.

A xuiciu de Orviz, nuna situación como l'actual  d'empeoramientu de la crisis, la salida pasa pola reactivación económica, la protección social, la meyora del sector agrariu y garantizar los servicios públicos, y “estos presupuestos nun atienden a esos criterios”.

Pal voceru parlamentariu d'IX namá esiste una cosa peor que nun tener presupuestu, y ye qu'ésti sía malu. A xuiciu de Martín el proyectu que van defender PSOE y PP nun respuende a les necesidaes sociales de los ciudadanos nin al oxetivu de crear empléu. “Eso ye xustu lo que lu pasa a esti presupuestu”, dixo Martín antes de calificar el proyectu como de “resignación” y alvertir de que nun va dar solución a la llista d'espera del salariu social, nin a la llista d'espera quirúrxica, ente otres cuestiones, amás de tener el nivel d'inversión granible más baxu en “bien de años”.  Ye, amás l'ensayu del alcuerdu ente'l PP y PSOE que va más allá del presupuestu, que pretende dir más allá de les elecciones.

P'Aurelio Martín, el problema que presenta'l presupuestu nun ye solo una cuestión de distribución del gastu, sinón d'ingresos, yá que arrenuncia a unos impuestos más solidarios que tienen un papel de redistribución per parte de los que más tienen a los que menos. “Arrenunciu a tener más ingresos, por casu vía impuestu de patrimoniu o donaciones y amás baxa l'IRPF a les rentes altes”, esplicó'l voceru nun analís que nun ye namái d'IX, sinón que comparten tamién UXT y CCOO.  Martín aseguró qu'IX nun pretende una propuesta fiscal de “llocura”, sinón que l'IRPF o Patrimoniu a les rentes altes tengan una media similar a la d'otros países europeos, por casu los nórdicos. Tampoco pretende IX gravar nin a les clases baxes, nin  a los mileuristas, nin a los pequeños autónomos, el trabayadores o los comerciantes, sinón  solo aquellos que deben de pagar más pa tener una sociedá más xusta. “Nun ye esplicable que los herederos de la Duquesa d'Alba o de Botín nun vaigan pagar casi nada, ye un problema de ser xustos”, aseguró finalmente.