Menu

El diputáu d'IX y voceru parlamentariu d'Interior, Ricardo Sixto, señala mientres la defensa de la proposición non de llei que l'Executivu de Rajoy almite asina les presiones ya intereses marroquinos al “plegar la so política d'asilu y de defensa de los derechos humanos”

El Partíu Popular echó per tierra güei nel Congresu la iniciativa parlamentaria que plantegaba encamentar al Gobiernu de Mariano Rajoy a conceder asilu nel nuesu país al activista saharagüi Hassana Aalia, el mozu de 27 años que foi condergáu por un tribunal militar marroquín a cadena perpetua en febreru de 2013, tres un procesu cuestionáu por diversu observadores internacionales. D'esta forma, l'Executivu español vence a les presiones ya intereses del Reinu de Marruecos al “plegar la so política d'asilu y la so política de defensa de los derechos humanos”, según denunció na so intervención Ricardo Sixto, diputáu d'IX y voceru parlamentariu na Comisión d'Interior.

Los ‘populares’ impunxeron asina los 23 votos de la so mayoría absoluta nesta comisión pa baltar la proposición non de llei impulsada por IX, ICV-EUiA, CHA -roblada conjuntamente pol PNV y la mayor parte del Grupu Mistu- por que'l Gobiernu del PP rectificara la so negativa a conceder esti asilu a Aalia, una postura que caltien inamovible dende va meses.

Ricardo Sixto recordó que Marruecos emitió una orde de busca y captura contra l'activista saharagüi por participar en 2010 nel campamentu de protesta pacífica de Gdeim Izik, que foi desmanteláu pol Exércitu marroquín “a sangre y fueu”. Aseguró qu'aquella violencia supunxo “de facto una rotura unillateral que s'estiende nos territorios ocupaos, y a la que los saharagüis tuvieron que faer frente como pudieron”.

“Tamos falando d'un conflictu armáu que lleva munchos años paralizáu gracies a la voluntá negociadora que demostró'l pueblu saharagüi, pero que nun escaezamos qu'empezó armáu, porque yera un conflictu de descolonización que nun terminó conforme a los resolvimientos de Naciones Xuníes”, señaló'l diputáu d'IX.

Sixto calificó tamién na so intervención como “auténticu xuiciu farsa” la vista na que fueron valoraos los fechos y qu'acabó cola grave condena a Hassana Aalia, lo que coincide cola calificación que mereció a un importante númberu d'organismos internacionales y asociaciones de Derechos Humanos.
La Comisión d'Asuntos Esteriores del Parlamentu Européu, la Fundación Sahara Occidental, Human Rights Watch y Amnistía Internacional, ente otros, denunciaron que'l xuiciu del tribunal militar marroquín nun cuntó coles abondes garantíes y pidieron al Altu Comisionado de Naciones Xuníes pa los refuxaos (ACNUR) protección pa Aalia.

De la mesma forma, el parllamentariu d'IX esixó al Ministeriu d'Interior español qu'intervenga “d'urxencia” nesti casu y “reconsidere” la propuesta d'espulsión del activista saharagüi, retire la orde de salida y conceda el pidimientu d'asilu, que ta “dafechu xustificada”.

Hassana Aalia ta n'España dende 2011, cuando llegó a Bilbao pa estudiar con una beca. Cuando-y quedaben dos meses pa volver a El Aaiún, Marruecos emitió una orde de busca y captura contra él pola so participación en Gdeim Izik. Entós decidió nun volver a los territorios ocupaos del Sáhara Occidental. Primeramente fuera xulgáu por sumase a esa protesta y condergáu tan solo a cuatro meses de prisión ensin execución. Pero en 2013 el Tribunal Militar de Rabar emitió sentencia contra 25 civiles acusaos d'entamar el campamentu, ente ellos Aalia quien, al tar n'España, foi xulgáu en rebeldía y condergáu a cadena perpetua.