Menu

Aurelio Martín sorraya qu'esta ye una de les lleis más deficientes qu'entraron nel parlamentu

El Gobiernu tendrá de modificar una vegada más el testu de la Llei de Bon Gobiernu pa resolver “los defectos estructurales” que detectaron nuevamente los servicios xurídicos de la Xunta Xeneral. Asina lo esplicó Aurelio Martín, voceru d'IX y presidente de la ponencia, una vegada que los lletraos de la cámara consideren que'l Gobiernu  tien que modificar l'artículu 17, non el 21, y la mesma esposición de motivos del proyectu de llei. “Esperamos que'l Gobiernu atine y mándenos el testu correctu col cambéu del artículu 17, que ye'l  que fai referencia al réxime sancionador. El cambéu supondría escluyir del artículu 17 al Presidente y los Conseyeros, esto ye, sería una Llei de Bon Gobiernu que nun afectaría a Presidente y Conseyeros, sí a Directores y Secretarios Xenerales”, alvirtió Martín.

El réxime sancionador qu'agora tendría de proponer la Llei de Bon Gobiernu nun afectaría al Presidente y a los conseyeros, porque topeta col Estatutu d'Autonomía y la Llei del Presidente, qu'establecen qu'al presidente escuéyelu'l parlamentu y solo pue cesar por moción de censura del parlamentu, non por una sanción de los conseyeros, como proponía primeramente. “Quien redactó esa llei nun conocía o nun sabía qu'hai otres lleis que regulen estes situaciones y ponnos nuna situación casi increíble dende'l puntu de vista de técnica lexislativa”, dixo Martín.

El voceru d'IX, aseguró esta mañana que “la llei ye una de les peores lleis, una de les más deficientes, qu'entró nel parlamentu y  nun lo dicimos solo los parllamentarios, sinón los servicios xurídicos, por eso pidimos al Gobiernu que faiga los deberes porque amás tamos en tiempu llende”.

El principal problema d'esta llei ye iguar los defectos estructurales que tien, esplicó al términu de la xunta de güei de la ponencia, pa puntualizar que les enmiendes parciales, son otru retu, anque “van tener meyor solución”. “Ensin solucionar los artículos qu'afecten al Estatutu d'Autonomía, como son los de les sanciones, el 17 y el 21, nun vamos poder solucionar les otres. Éstes afecten a la estructura de la llei y planteguenlo los servicios xurídicos de la cámara”, repitió

La ponencia axuntará'l próximu martes y los diputaos esperen que'l Gobiernu mande los testos correctos esta mesma selmana.