Menu

La eurodiputada d'Izquierda Xunida Ángela Vallina pidió que la Comisión Europea investigue si tán frayándose les directives de competencia de la Unión Europea polos precios de melecines como Sovaldi, el fármacu pa curar la hepatitis C que'l so tratamientu per un añu cuesta 25.000 euros.

Vallina recordó que nel Estáu español morrieron 4.000 persones en 2014 afectaes d'hepatitis C porque “el nuesu Gobiernu nun actuó pa que los nuevos fármacos fueren mercaos tal qu'aprobó l'Axencia Europea de melecines”. Y mientres, prosiguió Vallina, “al sistema financieru siguíamos inyectándo-y miles de millones”.

“La hepatitis C –amestó- nun ye namái unu de los grandes problemes de salú mundial, sinón que tamién ye la principal causa de tresplantes hepáticos na UE. Sabemos qu'el Sovaldi, con un 90% d'ésitu, podría ser producíu como melecina xenérica por unos 100 euros, pero'l propietariu de la patente vendelo por 25.000”.

Asina, Vallina preguntó si'l Parlamentu y la Comisión tán al tantu d'esti fechu y si creen que l'Estáu español “ta frayando dalgunes de les directives que garanticen el derechu d'una alta protección a la salú”.

“Pidimos que la Comisión Europea abra una investigación sobre la vulneración de les normes de competencia polos altos precios d'estes melecines. Y queremos recordar qu'otra posible midida a tomar ye la llicencia obligatoria en casu de que'l preciu abusivu niegue'l derechu y torgue la viabilidá del sistema. Queremos esa investigación con priesa, por favor, los enfermos nun tienen tiempu”, cerró.