Menu

El grupu parlamentariu d'IX na Xunta Xeneral enmendó una proposición non de llei de Foro Asturies na que se pidía modificar el IGI de diversos espacios protexíos nos conceyos de Casu y Sobrescobiu y demás normativa aplicable nel ámbitu de la so competencia en visu a autorizar de forma controlada y reglamentada l'usu deportivu, lúdicu, recreativu y turísticu de los banzaos de Tañes y Ruseco, los sos marxes y los ríos del Parque natural de Redes.

IX pidió al traviés d'una enmienda que foi aceptada que s'escluyan los ríos del Parque d'esti usu deportivu, lúdicu o recreativu, dexándolos como tán con solo la pesca tradicional dexada. “Los ecosistemes naturales de los ríos son bien importantes y nun queremos que se desenvuelva nellos nengún tipu d'actividá más allá de la pesca, queremos un modelu sostenible y non el d'un parque d'atracciones”, aseguró'l diputáu d'IX Ovidio Zapico.

Ovidio Zapico tamién puntualizó que ye posible aprovechar el banzáu de Ruseco dende'l puntu de vista ornitolóxicu y  que na so marxe izquierda podría diseñase un paséu y miradores que potenciaren la zona de anillamientu d'aves de La Polina, que ta prohibíu nel IGI. “Introducir cualesquier otru aprovechamientu coles fluctuaciones tan grandes d'agua nun me paecen posibles”, esplicó'l diputáu d'IX.

Tocantes a Tañes, Zapico sostuvo que l'usu tien de faese dende'l  rigor, la sostenibilidá y dende la esclusión tayante de cualquier vehículu a motor, dende l'aplicación dende'l principiu de midíes series pa que en nengún momentu puedan dase problemes como'l moxón zebra …

A xuiciu de Zapico los dos banzaos pueden tener un aprovechamientu más allá de los usos actuales y la calidá de l'agua, si faen estudios rigorosos, nun debería trate alteriada. Zapico recordó que tolos pueblos de Casu qu'arramen al Nalón tienen el saneamientu ensin faer, ensin qu'eso suponga una amenorga na calidá de l'agua que peracaben los habitantes de la zona central yá que ta sometida a tratamientu posterior y” llega a los grifos con tola garantía sanitaria”.

Una vegada aceptada la enmienda, IX votó a favor de la iniciativa de Foro Asturies d'autorizar de forma reglamentada l'usu deportivu, recreativu y turísticu de los banzaos de Tañes y Ruseco, con toles prescripciones esplicaes enantes. La iniciativa foi aprobada colos  votos del PP, FAC ya IX, l'astención de Ciudadanos y Podemos y los votos en contra del PSOE.