Menu

Ovidio Zapico alvierte de que'l fumo de les quemes nun puede tapar el grave problema que lleva a tomar midíes estraordinaries

Ovidio Zapico, diputáu d'IX na Xunta Xeneral, va pidir la comparecencia urxente de la conseyera d'Infraestructures y Mediu Ambiente, Belén Fernández, y de la directora xeneral  de Prevención y Control Ambiental, María Elena Marañón, pola situación siguida de contaminación estrema que se ta produciendo nel Principáu nos últimos tiempos. A xuiciu del diputáu esta situación nun puede pasar desapercibida políticamente pol problema de les numberoses quemes, “el fumo nun puede cegar la vista d'un problema grave que llevó a tomar midíes estraordinaries n'Uviéu, Xixón y Avilés”  y que va llevar a Asturies a volver asitiase nel top de les zones más contaminaes d'España.

Esta situación, según Zapico, precisa yá de tomar de midíes  per parte de l'alministración responsable, ensin qu'estes sían “escurrimientos” como la del día 7 n'Uviéu. “Asturies precisa que s'actúe con rotundidá, actuando nos focos emisores y tomando midíes tresversales, como pueden ser midíes nel tresporte públicu”, alvierte'l diputáu de la que sorraya qu'estes acciones tienen de sirvir pa tola zona central, onde viven  800.000 persones.

El diputáu d'IX recuerda que'l tiempu dio la razón a les demandes de la coalición y que la so posición nunca foi nin demagóxica nin electoral cuando denunciaba que nun yera un problema puntual d'unos pocos de cientos d'habitantes, como dicía la conseyera Belén Fernández.

A lo último, Zapico demanda que la conseyera actúe de forma atayante cumpliendo coles midíes del plan de choque aprobaos a instancia d'IX na Xunta Xeneral o IX va esixir a Javier Fernández que ponga orde na conseyería.