Menu

L'alcaldesa de Teberga empecipia la llimpieza del tramu del so conceyu pero demanda un arreglu fondu per parte del Principáu

Ovidio Zapico, diputáu d'IX na Xunta Xeneral, rexistró esta selmana una entruga oral al plenu, sobre qué midíes y en qué plazos el Gobiernu piensa revertir la situación de decadencia y abandonu que sufre la Sienda del Osu.

Ovidio Zapico, diputáu d'IX responsable de los asuntos de Turismu y de Mediu Ambiente considera que la Sienda del Osu foi una infraestructura vital pal desenvolvimientu de los Valles del Trubia, un  apueste decidíu qu'evidentemente produció un desenvolvimientu y una resultancia económica relevante. Sicasí, a xuiciu del diputáu d'IX, güei ta nun estáu llaceriosu que se repara a güeyu: numberosos desprendimientos, valláu rotu o podre, falta de lluz nos túneles… que yá dieron llugar a fechos luctuosos.

Zapico considera que pa siguir apostando pol desenvolvimientu turísticu sostenible ye necesario que'l frente municipal que lidera l'alcaldesa de Teberga, María Amor Álvarez Ardura tenga una respuesta per parte del Principáu. “Lamentablemente va llegar tarde yá pa una dómina turísticamente importante como ye la Selmana Santa y, una vegada más, van ser los conceyos los que tengan qu'aplicar midíes paliativas”, asegura'l diputáu d'IX.

Independientemente de les midíes correctores que puedan poner en marcha los alcaldes de los Valles del Trubia, ye obvio que la Sienda del Osu precisa una inversión importante pa fae-y un arreglu total y que'l so caltenimientu sía añal, yá que de nada sirve invertir 60.000 euros d'una vegada si depués en 10 años nun se fai nada.

“Yo espero del Principáu, de quien ye la competencia, una respuesta positiva a la xunta que l'alcaldesa va caltener el día 23. De nun ser asina, IX va llevar esti asuntu al plenu de la Xunta Xeneral”, alvierte Zapico.

Arreglu nel tramu tebergán de la Sienda

Per otru llau, María Amor Álvarez Ardura, alcaldesa de Teberga, miembru d'IX, anunció esta mañana que los operarios municipales tán llimpiando'l tramu de la Sienda del Osu que pertenez al so conceyu p'acondicionala pa la llegada de visitantes la próxima Selmana Santa. L'alcaldesa ordenó a los operarios la realización d'esti mínimu acondicionamientu ante la falta d'actuación del Principáu que nun llevó a cabu la llimpieza de piedres, los árboles cayíos y otros desperfectos detectaos. Álvarez Ardura alvierte, sicasí, que se trata d'una actuación mínima nel tramu que correspuende al conceyu, d'aprosimao 2,3 kilómetros, pero que la meyora integral tien de llevala a cabu'l Gobiernu autonómicu en tolos conceyos que conformen los Valles del Trubia.

L'alcaldesa solicitó una xunta col Director de Recursos Naturales, Manuel Calvo, pa buscar soluciones a la situación de la Sienda del Osu, pero esti alcuentru foi retardáu pal día 23, colo que nun va llegar a tiempu pa poner en marcha actuaciones de cara a la Selmana Santa.