Menu

El nuevu coordinador xeneral d'IX Asturies ve facedero algamar alcuerdos ente les distintes corrientes porque toes comparten cuestiones de fondu

Suárez y Rañón dispuestos a buscar puntos d'alcuentros mentantu que Telly Lorenzo nun ve problema en llegar a l'asamblea con delles llistes

El coordinador xeneral d'IX, Ramón Argüelles, propunxo güei a los otros contendentes na carrera pol lideralgu de la organización la necesidá de consensuar una candidatura pa la próxima asamblea de los próximos díes 4 y 5, n'Avilés. “D'ende va salir la coordinadora que va ser l'órganu que rixa Izquierda Xunida, l'alma máter pa la próxima llexislatura, y gustaríame que pudiéramos dir con una llista consensuada, porque'l sistema de primaries tien un peligru: que pueda haber un coordinador, pero, si tolos demás pónense en contra, pue ser que'l coordinador nun tenga más que voz que l'órganu executivu, como la coordinadora taría en manos d'otra xente. Creo que somos toos conscientes de que tenemos que dir nesti barcu y los mios compañeros asina me lo treslladaron”.

Pal máximu responsable d'IX Asturies, esiste un únicu documentu a aldericar na asamblea, polo qu'amosóse convencíu de qu'esisten posibilidaes reales d'alcuerdu. “Creo que no fondero, lo d'abrir IX, lo de ser más cercanu a les organizaciones, lo de que la xente nuevo tenga daqué que pintar, creo qu'esi mensaxe tenemoslu toos”.

Al respective de les fórmules pa llograr mayor incidencia pública, Ramón Argüelles, apostó por tender llazos pa consiguir una mayoría d'izquierda. “Nun sé cuál ye la fórmula, si ye en candidatures conxuntes, si hai que dir por separao pero con un mensaxe similar. Lo que sí digo ye que, gustaríanos, dende la dirección d'IX que se cree, tener una secretaría de confluencies pa que se falara non solo con Podemos, sinón con otres fuerces asturianes que tienen enforma que ver col cambéu, como pueden ser Equo, Alternativa Socialista, Izquierda Asturiana, y otros cuantos movimientos que tamos trabayando no mesmo”.

Alejandro Suárez, segundu más votáu en primar a la coordinación, aseguró que nestos momentos ye necesariu buscar la estabilidá d'IX. “Vamos falar de política. La nuesa perspectiva ye intentar alcordar la política con al respective de les confluencias, tamién sobre'l funcionamientu internu de la organización y depués, darréu, vendría la llista única nos órganos de dirección pero tenemos que tener un alderique políticu tranquil, en función del respaldu que tien cada unu”. Eso sí, matizó Suárez, “quien perdemos tenemos una obligación de buscar esa estabilidá porque IX tien que salir el próximu llunes xunida frente a un montón de retos”.

Pa Fernando Díaz Rañón, IX tien qu'aldericar y dialogar con quien tea dispuestu a avanzar na atención a les necesidaes sociales anque, esclarió, “nunca difuminarnos nuna marea o n'asamblees populares o daqué asina. Nós neso, en principiu, nun tamos d'alcuerdu”. Les confluencias sía que non, añedió, tienen que respetar “les nueses señes d'identidá”. Más allá de la llista única, Fernando Díaz Rañón amosó la disposición a trabayar por una dirección que, si ye posible, reflexe lo que ye la organización. “Taríamos dispuestos a falar siempres qu'esa dirección reflexe lo que IU Asturies ye. Sería lo correcto y lo meyor”.

Finalmente, Telly Lorenzo quitó importancia al fechu de que na próxima asamblea llegar con una o más llistes. “Nun m'esmolez”, dixo, yá que, na so opinión, forma parte de la pluralidá d'IX, polo que nun habría mayor problema. Otra cosa, aseguró, ye que se lleguen a alcuerdos. “Mientres tol procesu d'estes primaries, nós sostuvimos qu'unu de los déficits d'IX yera la xestión de la pluralidá. Que podamos siguir siendo atentos, a pesar de que representemos distintes formes de ver la organización nun significa que nun tengamos un proyectu común”