Menu

Izquierda Xunida va impulsar un "gran pactu" contra la contaminación nel que pretende apigurar les voluntaes y acciones d'alministración, sector priváu, axentes sociales, partíos políticos y sociedá civil, dende asociaciones de vecinos a organizaciones ecoloxistes.

El coordinador xeneral de la formación, Ramón Argüelles, anunció güei n'Avilés esta iniciativa que, cola denominación "Declaración d'Avilés" ta empobinada a un cambéu nel modelu de xestión medioambiental, con una adecuación de les autorizaciones ambientales integraes, que tienen de realizase teniendo en cuanta la peor situación posible en cuestión d'inversiones térmiques. La declaración, que se va aldericar esta tarde ente miembros de la organización y que pretende ser el puntu de partida pa un alcuerdu ampliu con otres fuerces y organizaciones, va incluyir tamién la esixencia d'ellaborar un Plan calidable d'Aire pa toa Asturies y la revisión de los locales que yá puedan esistir, apantallamientos de parques de carbones y graneles sólidos nos puertos asturianos y un refuerzu humanu y material de los servicios de vixilancia y control de la contaminación.

Izquierda Xunida escoyó Avilés pa entamar esta xornada y presentar esta batería d'acciones dada la hestoria de la ciudá que, en palabres d'Argüelles, tien el "dudosu honor" de ser y caltenese como un llugar especialmente afectáu pola polución. La situación tien d'ameyorar y según el coordinador d'IX Asturies, ye poco aceptable que la ciudá apaeza al pie de Madrid o Barcelona cuando se producen episodios de contaminación estraordinarios.

Na rueda de prensa, el coordinador de IU Avilés, Angel Guido García destacó'l compromisu de la so formación na llucha contra la contaminación y la necesidá de poner en marcha esti pactu.

Gabriela Álvarez, secretaria de Política Municipal, anunció qu'esti pactu va acompañase cola presentación de mociones nos distintos Conceyos d'Asturies pa esixir midíes clares que garanticen un mediu ambiente afayadizu y que sirvan como presión por que la Alministración rexonal asuma la so responsabilidá.

Pela so parte, el diputáu autonómicu Ovidio Zapico resaltó que la Declaración d'Avilés surde ante la pasividá de la Conseyería de Mediu Ambiente d'Asturies, que al so xuiciu tendría de liderar dende fai enforma este proceso frente a la contaminación pero que, sicasí, conformase con responsabilizar al mal tiempu de los episodios contaminantes.