IX esixe a Bruxeles que pida una auditoría detallada sobre'l destín de les ayudes al carbón
Ángela Vallina plantega, na Comisión de Pidimientos, que'l Ministeriu d'Industria y Enerxía informe d'estes subvenciones según el Tribunal de Cuentes
La eurodiputada d'IX Ángela Vallina reclamó ante la Comisión de Pidimientos que se solicite una auditoría detallada al Ministeriu d'Industria, Enerxía y Turismu, sobre'l destín de les ayudes al carbón, y que se reclame tamién al Tribunal de Cuentes toa esta información.
La parlamentaria demanda, amás, que se caltenga abierta'l pidimientu realizáu nel so día pol Conceyu de la Robla, nesti sentíu, por culpa de que, al so xuiciu entá nun se dieron esplicaciones abondes sobre l'usu de les ayudes, tal que reclama esti conceyu.
Ángela Vallina recuerda na so intervención que dende 1990, hubo 5 planes del Carbón n'España, que tendríen de ser denominaos “planes de zarru de la minería”, por culpa de que, añedió, con ellos sumió prácticamente l'actividá que minera que fai menos de 3 décades garantizaba unos 50.000 puestos de trabayu directos.
N'Asturies, esplicó Ángela Vallina, sufrimos l'esmantelamientu total de les mines de carbón, col zarru programáu pa 2018. El procesu nun foi pareyu, criticó, a una reconversión industrial, de forma que les cuenques mineres tienen cifres récord de pérdida de población y avieyamientu, ante l'éxodu de los mozos por falta d'emplegu.
El zarru de la minería nun foi pareyu a un amenorgamientu del usu de carbón como combustible. Ello ye qu'enfatizó la eurodiputada asturiana, les centrales térmiques españoles siguen quemando carbón d'importación, daqué especialmente grave, yá que nun hai garantía de qu'esi mineral fuera estrayíu cumpliendo unos mínimos requisitos de respetu a los derechos llaborales. Nesti sentíu, Ángela Vallina recordó que la mesma Comisión, reconoció-y en mayu que nun tien mecanismos pa garantizar la esclusión de mano d'obra infantil, el control medioambiental, o los abusos contra el trabayadores na so estracción.
“Tenemos de preguntar qué pasó agora col dineru invertíu na reconversión de les cuenques mineres: ¿a cuánto xubió? ¿revirtió nel bien de la población? ¿creóse emplegu calidable?” aprofió Ángela Vallina.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies