Menu

El coordinador xeneral d'IX axuntóse güei con delegaos de CC OO na organización qu'impulsa un nuevu modelu de negociu que fai la competencia a los sos propios trabayadores

Izquierda Xunida va sofitar les reivindicaciones de los trabayadores de la ONCE qu'esixen un xiru nel modelu de negociu impulsáu pola actual dirección de la entidá, qu'empecipió una espansión de los puntos de vienta al traviés de supermercaos, gasolineres o estancos, en desterciu de el vendedores tradicionales del cupón. Nesti sentíu, el coordinador xeneral de la formación, Ramón Argüelles, recordó qu'IX apuesta por un emplegu calidable en tolos ámbitos y la ONCE, enfatizó, nun puede escaecer la función pa la que foi creada. “Magar ye verdá que tien que ser económicamente sostenible, eso nun puede ser a cuenta de los derechos llaborales de los sos trabayadores. Tien que ser compatible”. Sía que non, anunció Argüelles, “que cunten con nós, con IX, a nivel institucional, nel Parlamentu, nos conceyos, onde tenga que ser, porque la so causa ye la nuesa causa”.

Pela so parte, Raúl López García y Jesús Castañu, delegáu de CC OO n'ONCE, tresmitieron la gran esmolición ente los trabayadores ante lo que denominen “masiva espansión” de los puntos de vienta adicionales y ayenos a los tradicionales vendedores, yá que, dixo, “repercuten negativamente nel nuesu trabayu”.

López recordó que, magar ONCE na so fundación tenía unos oxetivos y que por décades ayudó a muncha xente, anguaño, les sos plantiyes tán en peores condiciones. “Queremos que la sociedá se dea cuenta de lo que ta pasando: los nuesos ingresos acaldía son menores, les vientes son menores, tán cayendo”. Y ye que, llamentó López, esa cayida de los sos ingresos coincide con una medría de los ingresos totales, por cuenta de les nueves canales de distribución que, sicasí, nun cumplen cola función pa la que foi creada la entidá. “Xenérase emplegu pa la discapacidá mercando'l cupón al vendedor, non en grandes superficies, estancos nin gasolineres”.

Pa IX, ye un contrasentíu que se caltenga la esixencia a los vendedores de cupón  d'unos mínimos de vienta, de la que xorrez la competencia per parte de la mesma entidá, al traviés de les nueves canales de distribución, no que denomó “competencia deslleal”. Argüelles reclamó que la ONCE siga siendo una "ferramienta” pa favorecer la integración de les persones. Sicasí, matizó: “esa integración completa, dende la educación, hasta l'insertamientu pero, tamién pa la promoción llaboral. Nun podemos sacar beneficios a cuenta de estrumir el capital humanu”.

El problema, a xuiciu de Ramón Argüelles ye que, de la que se tán aumentando los puntos de vienta ayenos a la organización, ta produciéndose un retrocesu nel emplegu d'ONCE. Por eso, el coordinador pidió a la entidá mayor sensibilidá con esti colectivu”.

Mayka Barros, la secretaria de Movimientos Sociales d'IX, destacó'l respaldu que dio yá IX a les reivindicaciones de los vendedores de cupón y aportunó en que la formación va caltener el so sofitu a les movilizaciones que puedan convocase.