Menu

Concha Masa, diputada d'IX na Xunta Xeneral, volvió sacar a alderique esta mañana na Xunta Xeneral el problema irresueltu del tresporte escolar na zona rural y punxo de relieve que les ayudes nun cubren en tolos casos la totalidá del costu del tresporte, les ayudes convóquense y concédense enforma tarde, teniendo les families que costear mentantu los gastos hasta que se-yos concede, y que les cuantíes tán calculaes de manera cicatera”.

Masa recordó dos casos concretos: el de los neños de Buseco y la neña de La Felguerina, en Casu. En Buseco, Masa esplicó qu'hasta l'añu pasáu la cantidá abonada a los padres, que llevaben personalmente a los sos fíos a la escuela, non porque lo escoyeren asina, sinón porque escarecíen de serviciu de tresporte públicu, magar nun cubrir el gastu de tiempu, trabayu y disponibilidad, a lo menos venía cubriendo los gastos económicos derivaos del vehículu. Pero l'añu pasáu, por aciu una nueva normativa, la so Conseyería retayó estes ayudes, faciendo qu'amás del esfuerzu, tiempu, vehículu y disposición, tuvieren qu'asumir económicamente, como munches otres families, parte del gastu del tresporte. Masa tamién-y dixo al conseyeru, que nel Plenu del 3 de Marzu de 2016 (el primer plenu onde se trató esta tema), reconoció públicamente que les ayudes yeren insuficientes. Como solución, tantu na Comisión d'Educación del 15 de marzu de 2016 como nel Plenu del 17 de Marzu de 2016, comprometiose a abonar los viaxes de vuelta en vacíu con calter retroactivu. ¿Cumplióse esti compromisu? ¿Cómo se fixo'l cálculu correspondiente? ¿Por qué esta familia llevó'l casu a los tribunales?

En Casu, la neña camudó de centru escolar y por consiguiente tenía una nueva ruta de tresporte. Esta ruta, al ser usada por namái una neña, nun recibe l'aportación directa de la Conseyería y tiense que financiar al traviés de les ayudes al tresporte, ayudes que, en tantu convóquense y resuelvan, obliguen a la familia a adelantrar el dineru.

Nesti casu concretu ye'l Conceyu quien cuerre colos gastos d'esta llínea de tresporte hasta'l momentu de la convocatoria. Pero a partir d'esi momentu, salten les alarmes. Recordamos que'l costu ye de daqué más de 7000 € al añu y la Conseyería varió les sos ufiertes dende los 3600 € hasta los 1800 € yá nos últimu díes antes de llegar a un alcuerdu. Darréu, nel mes de xineru y tres una manifestación y posteriores concentraciones frente a la Conseyería, usté aporta a axuntase cola familia. D'esta xunta sale un alcuerdu ente dambes partes: la Conseyería apurriría 6300 € y el restu, unos 600 € aprosimao, sería apurrío pola familia.

Masa pidió a Genaro Alonso un compromisu personal decidíu "cola escuela rural y el tresporte que lleva acomuñáu y que nun se dexe afectar por males influencies", dempués d'espresar que “da la impresión de que dende'l Gobiernu ta tresmitiéndose la idea de que'l tresporte y l'educación nel mundu rural suponen pa l'Alministración un gastu tresmandao y difícil d'asumir”. Esi argumentu, señaló yá de por sí atenta contra la igualdá d'accesu a la educación, pero ye que “amás ye falsu”. N'Asturies hai unos 14.000 neños que faen usu del tresporte (urbanu, públicu o priváu) pa dir a la escuela, exemplificó. La media de les ayudes concedíes anguaño pa les families obligaes a realizar el tresporte pelos sos propios medios ye de 518 €, tres veces inferior a la media del restu de neños tresportaos.

“Si unu pasa poles escueles rurales asturianes va poder comprobar que se trata de pequenos edificios que'l so costu de caltenimientu ye risible, nun cunten con nengún tipu d'infraestructura, nun cunten con polideportivu, nin salón d'actos, nun cunten con patios cubiertos, nun cunten con aules d'informática, nin llaboratorios, nun cunten con comedores, etc. Cunten, eso sí, cola dedicación incondicional de los sos profesores y cola collaboración ilusionada de les families. Y pretenden cuntar, poques gracies, con un sofitu claru per parte de l'Alministración”, concluyó.

Alonso dixo que los casos a los que se refirió la diputada d'IX son fechos puntuales resueltos y que nun se dexa influyir por malos conseyos porque nun tien malos conseyeros. Tamién negó dicir nunca que l'apueste pola educación rural fora un gastu tresmandáu.