Menu

Mieres yá trabaya na incorporación d'esti tipu d'esixencies y la formación presentó una PNL por que'l Principáu esixa'l cumplimientu d'unos mínimos nes sos llicitaciones

Concha Masa destaca qu'esti tipu de midíes torgaríen conflictos como'l recién del tresporte escolar o'l del hotel Reconquista

Les clauses van incluyir esixencies de garantía llaboral, pa favorecer la igualdá y la sostenibilidá

Izquierda Xunida va proponer la incorporación de clausulas sociales nes contrataciones tantu de Conceyos como de la Comunidá Autónoma. La diputada d'IX, Concha Masa, la secretaria de política municipal, Gabriela Álvarez, y el conceyal d'IX Mieres, Juan Ponte, apostaron pola inclusión esixencies en materia llaboral, medioambiental y d'igualdá nos pliegos de condiciones de la contratación pública. Tratase de faer d'obligáu cumplimientu unos mínimos que, nestos momentos, nun tienen l'abonda cobertoria como pa poder esixilo en toles alministraciones.

Con esti fin, IX presentó una PNL na Xunta Xeneral del Principáu por que la Alministración rexonal comprometer a la incorporación de les clausulas sociales y, amás, van impulsase mociones nos distintos conceyos por que esos principios sían tamién d'aplicación na actividá municipal.

Concha Masa reivindicó la necesidá d'esti tipu d'esixencies yá que, afirmó, evitaría conflictos como los que yá se producieron en contratos como'l del tresporte escolar o'l de el trabayadores del hotel Reconquista. “El conteníu d'esta PNL ta respondíu por por normativa europea que yá encamienta a les alministraciones públiques a establecer clauses sociales nos sos contratos y, amás pensamos que ye de xusticia y que ye una cuestión práctica porque tamién evitaría conflictos llaborales qu'agora se tán produciendo precisamente porque empreses subcontrataes pola mesma alministración del Principáu nun cumplen les condiciones llaborales, sociales y medioambientales qu'esperamos”:

Pa la secretaria de Política Municipal d'IX destacó l'intensu trabayu previu realizáu antes de llegar a esta propuesta que bebe, dixo, nel ADN” de IU Asturies, por cuanto qu'incide, de forma directa nel impulsu, dende les alministraciones, de contrataciones que potencien la calidá nel empléu xeneráu.

Mieres va ser unu de los primeros conceyos nos que se ponga en marcha, con calter xeneral, les contrataciones con clauses sociales. Pa ello, según esplicó Juan Ponte yá se trabaya con un cambéu nesti procesu que va implicar tener en cuenta estes esixencies. “Tratar d'alzar a calter obligatoriu nos documentos contractuales esta serie de derechos sociales y llaborales de les persones trabayadores”. Les clauses van recoyer, anunció'l conceyal, midíes que van torgar l'amenorgamientu unillateral de les condiciones de trabayu, nin en xornada nin en salariu; amás van obligar a la incorporación de toles midíes de meyora llaboral que puedan aprobase mientres la duración de los contratos; van incluyir mecanismos pa la inclusión nel mercáu llaboral de colectivos discriminaos socialmente, como persones con diversidá funcional o paraos de llarga duración. Al pie de ello, prevense tamién acciones pa favorecer la promoción de la economía con fines sociales, como cooperatives, xestión autónoma, y pequenes y medianes empreses.

Pero nun van ser solo cuestiones llaborales les que pretenden favorecese nestes clauses, sinón otres que la so meta ye favorecer la igualdá y non solo naquelles empreses con plantiyes cimeres a les 250 persones, que yá tán obligaes a ellaborar planes específicos. Nesti sentíu, esclarió Juan Ponte, reivindicó qu'inclusive con un volume d'empléu inferior yá tendrá de promocionase la ellaboración de conteníos formativos en materia d'igualdá ente homes y muyeres y, tamién, na llucha contra la discriminación del colectivu LGTBI, o la conciliación de la vida llaboral y familiar.

Finalmente, les clausulas sociales pretenden incorporar midíes en materia de sostenibilidá ambiental, como podría ser l'amenorgamientu del consumu d'enerxía, campañes de reciclaje y compostaje.