Menu

La coalición va encamentar al restu de los grupos a pronunciase sobro l'alcuerdu del nuevu cupu vascu ente PP y PNV al afectar al financiamientu del restu de comunidaes

Tamién va llevar a plenu una iniciativa pa conocer la opinión del nuevu conseyeru d'Emplegu ya Industria sobro la torna del talentu

El grupu parlamentariu d'IX na Xunta Xeneral va llevar al plenu d'esta selmana dos asuntos de caláu. Per un sitiu, na vez d'entrugues al Presidente IX va pidir a Javier Fernández un balance de los dos años de llexislatura y va esixi-y una remodelación a xeitu del Gobiernu pa tener una mayoría política n'Asturies pa escontra la izquierda. Por otru, va defender una Proposición Non de Llei que pide'l pronunciamientu de la Cámara asturiana frente al alcuerdu ente'l Gobiernu del PP y el Gobiernu Vascu, yá que supon, a xuiciu del voceru parlamentariu d'IX un modelu inxustu ya insolidariu col restu de les comunidaes autónomes.

Gaspar Llamazares, voceru parlamentariu d'IX na Xunta Xeneral desveló esta mañana los asuntos que'l grupu va defender esta selmana, na que tamién solicita la presencia per primer vegada del nuevu Conseyeru d'Industria, pa falar sobro la torna del talentu a Asturies y la investigación aplicada, amás de la reglamentación de los avistamientos de fauna selvaxe.

El mesmu día nel que se conoz dos dimisiones más na Conseyería d'Industria, la de la Directora Xeneral d'Industria y Telecomunicaciones, Sandra Velarde y el Director Xeneral d'Innovación y Emprendimientu, Francisco Delgado, Llamazares aseguró qu'éstes demuestren l'argumentación d'IX, que “el Gobiernu cerraba en falsu les feríes y qu'IX tenía razón”. El voceru d'IX señaló la so esmolición por esti zarru en falsu que, como les feríes, produz una hemorraxa”. D'ende que repitiera la invitación al Gobiernu por que se pare, que cavilgue autocríticamente sobro'l balance d'estos dos años de llexislatura y, en función d'esa reflexón, remocique a xeitu el Gobiernu non pa un zarru en falsu sinón pa tener mayoría parlamentaria y camudar la política n'Asturies escontra la esquierda”. Al so xuiciu esa reflexón tien de sirvir pa rellanzar la iniciativa política y el lideralgu políticu nesta segunda fase de llexislatura, “que ye decisiva pa saber si ye positiva o ye una nueva llexislatura perdida pa la comunidá autónoma asturiana”.

Respectu al nuevu cupu vascu, IX va defender xuna Proposición Non de Llei por que la Xunta pronunciese contra l'alcuerdu ente'l Gobiernu del PP y el Gobiernu Vascu que ye inxustu ya insolidariu col restu de comunidaes autónomes. “ Esi alcuerdu ye pa nós inxustu ya insolidariu y creemos que la Xunta tien qu'encamentar al Gobiernu central a que nun esista discriminación nin nel cupu nin nel futuru sistema financiamientu autonómicu”, esplicó a los periodistes. El problema del cupu vascu tal como ta diseñáu nesti momentu –como esplicaron los espertos, ente ellos Carlos Monasterio-, ye que representa un privilexu pal Gobiernu vascu y ta afectando al restu de les comunidaes autónomes, porque, recordó, “el presupuestu nun ye un chicle”.