Menu

Gaspar Llamazares, voceru parlamentariu na Xunta Xeneral, esixó esta mañana que los grupos parlamentarios nel Congresu, los mesmos que n'Asturies defendieron la llei pa la universalización de la sanidá, llevanten el vetu que'l Gobiernu de Rajoy acaba d'anunciar a la tramitación de la vuelta de la cobertoria sanitaria universal.

N'Asturies la propuesta de llei d'IX cuntó colos votos a favor del PSOE, Podemos, Ciudadanos y Foru. Llamazares recordó qu'esta reforma supondría dar cobertoria a más de 800.000 persones que se quedaron ensin ella nel añu 2012, anque prácticamente toles comunidaes siguieron emprestando atención a los inmigrantes.

Llamazares reaccionó asina al anunciu del Gobiernu de vetar esta tramitación por motivos económicos, cifrando en 1250 millones d'euros, una cantidá que Llamazares llomó de “barbaridá”, “ausente de realidá” que, por casu, el costu de poner en marcha l'atención primaria y farmacéutica n'Asturies pa estes persones supon 50.000 euros en 2015. La intención del Gobiernu ye la de bloquiar la reforma faciendo trampes, dixo'l voceru parlamentariu d'IX n'Asturies, que foi Presidente de la Comisión de Sanidá nel Congresu na antepenúltima llexislatura. Encamentó a la Mesa de la Cámara por que llevante el vetu d'una iniciativa pa recuperar los servicios públicos d'antes del Gobiernu de Rajoy y d'antes de la crisis. Puede faese por mayoría de la Mesa, dixo Llamazares.

Reconoz el Gobiernu nesa valoración, frente a lo que dicía hasta agora, que dexó fora de l'atención sanitaria a 50.000 españoles d'orixe, 600.000 estranxeros y 300.000 “ensin papeles” . “Nun yera ciertu aquello de que nun s'amenorgaba la cobertoria”, alvirtió. Llamazares alvirtió que'l Gobiernu nun puede faer trampes porque si había 600.000 persones de países con convenios que nun pagaben, nun ye un problema d'una llei, sinón d'ausencia de xestión del propiu Gobiernu. “¿Hasta esti momentu nun cobraben l'atención sanitaria cuando había un conveniu o cuando yera un priváu?”, nun me engaña, concluyó'l voceru d'IX.