Menu

Gaspar Llamazares, voceru parlamentariu d'IX na Xunta Xeneral, entruga al Gobiernu por qué niega'l nuevu conseyeru d'Emplegu, Industria y Turismu, Isaac Pola, y la directora d'Innovación y Emprendimiento, Ana Concejo, una entrevista a los representantes de los investigadores del ITMA.

A xuiciu de Llamazares ye “incomprensible” que dambos representantes institucionales negáranse a recibilos. El voceru d'IX fai un llamamientu al Principáu a que se tome en serio la investigación n'Asturies y nun siga mirando pa otru llau como asocede nel casu del ITMA.

En concreto, Llamazares acaba de rexistrar na Xunta Xeneral xuna batería d'entrugues por que l'Executivu asturianu respuenda por escritu a les siguientes cuestiones: ¿Cuál ye la razón pola que'l nuevu conseyeru y directora d'investigación negarase a recibir a investigadores del ITMA qu'amás son xuna parte importante del comité escoyíu nes últimes elecciones sindicales?; ¿Sigui sofitando'l gobiernu les continues midíes de restricción de derechos llaborales a el investigadores de la área de fotónica a pesar de les sentencies llaborales en contrariu?; ¿Cómo valora'l gobiernu les importantes cantidaes destinaes por ITMA a los sos contratos con despachos d'abogaos pa los sos continuos pleitos colos trabayadores?; ¿Va adoptar dalguna midida'l gobiernu como patronu pa protexer los proyectos d'investigación y los equipos d'excelencia del ITMA frente al acosu de la dirección?; ¿Inclúi'l gobiernu a los centros tecnolóxicos como ITMA na evaluación y programación del plan de ciencia ya investigación?; ¿Comparte'l gobiernu l'encargu y ellaboración per parte del ITMA de la so nueva estratexa empuesta a eslleir la área de fotónica y esvalixar a los sos miembros al marxe de la evaluación y el nuevu plan rexonal de ciencia ya investigación?

Llamazares recuerda que, con datos de 2015, siquier les dos terceres partes del financiamientu de la fundación ITMA corrieron a cargu del Principáu y, sicasí, la situación ye de desdexación de les sos funciones como patronu y principal financiador mientres la situación llaboral sigue deteriorándose con continues sentencies desfavorables a la dirección de la empresa y l'acosu a investigadores (y en concretu a la área de fotónica), acentuao en favor a los servicios a empreses, en contraste cola escelente valoración de los sos proyectos d'investigación.

Llamazares tamién alvierte de que, polo xeneral, el Plan de Ciencia ya Investigación que remata anguaño nun foi efectivu pa la investigación n'Asturies, primero polos retayos y segundu porque nun foi capaz de dirixir la investigación en relación a les necesidaes sociales y económiques d'Asturies. A xuiciu de Llamazares sería entá más grave que'l nuevu plan qu'empieza'l próximu añu tuviera los mesmos defectos, la falta de presupuestu y l'ausencia d'una orientación clara. El voceru d'IX alvierte de qu'hai nicios de que puede asoceder lo mesmo; un datu significativu ye qu'hai institutos con participación pública que tán ellaborando'l so propiu plan de ciencia ya investigación ensin la evaluación del anterior, cuando inda se ta axudicando esta evaluación nestos momentos. Esti ye tamién el casu del ITMA, denuncia Llamazares.