Menu

La formación refuga l'autorización del Conceyu que dexó la instalación del circu nel Parque de la Barquerina

IX yá promoviera iniciatives similares n'otros conceyos asturianos, como Xixón o Castrillón.

L'Área de Protección Animal d'Izquierda Xunida d'Asturies encamienta al Conceyu de Villaviciosa a “prohibir, nel marcu de les sos competencies, la instalación de circos qu'utilicen animales nos sos espectáculos”. Asina, la formación refuga l'autorización que concedió nel Conceyu maliayo al Circu Coliséu pa instalase nel Parque de la Barquerina hasta'l próximu domingu.

IX recuerda que “la exhibición pública d'animales y el so usu nel desenvolvimientu d'espectáculos circenses escuende tres de sigo situaciones nes que se fraya la protección y el bienestar animal promovidos pola Unión Europea dende la firma del Tratáu de Amsterdam”. “Práctiques como l'encierre en xaules, les restricciones d'agua y comida, o'l maltratu como forma d'ensayamientu, provoquen graves consecuencies na salú de los animales, xenerando situaciones de sufrimientu y estrés que modifiquen el so comportamientu natural”.

L'Área de Protección Animal considera que “nel contestu actual, nel que la sociedá ta empecipiando xuna nueva forma de rellacionase cola so redolada, l'usu d'animales n'espectáculos circenses tien de dexar de formar parte de la programación d'entretenimientu y festexos que promueven los conceyos nos distintos conceyos asturianos”. N'España yá son más de 180 los conceyos que prohibieron esta práctica, y Estaos como Finlandia, Suecia, Portugal o Grecia incorporaron la prohibición a la so lexislación. N'Asturies, IX hai promovido iniciatives similares en dellos conceyos, ente ellos los de Xixón y Castrillón.